বৰপেটা, 13 আগষ্ট : বৰপেটাৰ সৰ্থেবাৰীৰ বতিয়া গাঁৱত বৃহস্পতিবাৰে উদ্ধাৰ হয় এটা উৱলি যোৱা মৃতদেহ । বতিয়া ৰিজাৰ্ভৰ পানী জুঁৱলীত উপঙি থকা অৱস্থাত মাছলৈ যোৱা দুই কিশোৰে পোন প্ৰথমে দলনিৰ মাজত প্ৰত্যক্ষ কৰে মৃতদেহটো । মৃতদেহ উদ্ধাৰৰ ঘটনাক লৈ সমগ্ৰ অঞ্চলজুৰি এতিয়া সৃষ্টি হৈছে তীব্ৰ চাঞ্চল্যৰ ৷
ইপিনে গাঁওবাসীৰ খবৰৰ ভিত্তিতেই সৰ্থেবাৰী আৰক্ষী থানাৰ সহকাৰী উপ-পৰিদৰ্শক গোপাল দাসৰ নেতৃত্বত আৰক্ষীৰ এটা দল ঘটনাস্থলীত উপস্থিত হৈ উদ্ধাৰ কৰে মৃতদেহটো ৷
উদ্ধাৰ হোৱা মৃতদেহটো সৰ্থেবাৰীৰ সমীপৰ ভকুৱাটেপা গাঁৱৰ ফৰিদ আলীৰ বুলি চিনাক্ত কৰা হৈছে ৷ যোৱা পোন্ধৰ দিনে সন্ধানহীন হৈ আছিল ফৰিদ আলী নামৰ ঠেলা চালকজন ৷ ককাঁলত থকা এডাল ৰচীৰ ভিত্তিতেই পৰিয়ালৰ লোকে চিনাক্ত কৰে মৃতদেহটো ।
ঠেলা চলাই জীৱিকা নিৰ্বাহ কৰা লোকজনৰ মৃত্যুত এতিয়া সৰ্থেবাৰীত শোকৰ ছাঁ পৰিছে ৷ অৱশ্যে কি পৰিস্থিতিত লোকজনৰ মৃত্যু হ'ল সেই কথা এতিয়ালৈ স্পষ্ট হোৱা নাই ৷
লগতে চাওক-আমাৰ প্ৰজন্মৰ আটাইতকৈ বেছি উপাৰ্জনকাৰী অভিনেতা আয়ুষ্মান খুড়ানা : বাণী কাপুৰ
