জনীয়া, ২০ জুলাই : কলগাছিয়া ৰাজহ চক্ৰৰ অন্তৰ্গত লাংলাৰ বান শিবিৰত চিকিৎসা ব্যৱস্থাৰ অভাৱত হাহাকাৰ পৰিস্থিতিৰ সৃষ্টি হৈছে ৰোগীৰ মাজত ৷ দূষিত পানী সেৱন আৰু কদৰ্যময় পৰিৱেশৰ বাবে বন্যাৰ্ত সকল বেমাৰত আক্ৰান্ত হৈ পৰিছে ৷
স্মৰ্তব্য যে, মানাহ নৈৰ বানৰ ফলত লাংলা অঞ্চলৰ ঘৰ - দুৱাৰ পানীৰ তলত ডুব যোৱাত এইদৰে লাংলা মথাউৰিৰ ওপৰত শিবিৰ পাতি আশ্ৰয় গ্ৰহণ কৰিছে ৰাইজে । বৰভিটা জিলা পৰিষদৰ সদস্যা মহেলা খাতুনে এই বন্যাৰ্ত সকলৰ মাজত বান সাহাৰ্য বিতৰণ কৰে যদিও এইয়া তেওঁলোকৰ বাবে যথেষ্ট নহয় । বৰ্তমানেও খোৱাপানী, ঔষধ, শৌচাগাৰ, কাপোৰ আৰু আঁঠুৱাৰ অভাৱত চৰম হাহাকাৰ কৰিব লগা হৈছে বানাক্ৰান্ত ৰাইজে ৷
কলগাছিয়াৰ বান শিবিৰত ৰোগীৰ হাহাকাৰ
