বৰপেটা, 25 ছেপ্টেম্বৰঃ ৰাজ্যত এতিয়া উপ নিৰ্বাচনৰ ঢৌ ৷ উপ নিৰ্বাচনৰ দিন ঘোষণাৰ লগে লগেই ৰাজনৈতিক দল সমূহৰ মাজত বৃদ্ধি পাইছে ব্যস্ততা ৷
বিজেপিৰে মিত্ৰতা অক্ষুণ্ণ ৰাখিব অসম গণ পৰিষদে ৷ বিজেপি প্ৰাৰ্থীক জয়যুক্ত কৰাৰ বাবে সৰ্বশক্তিৰে চেষ্টা চলাব অগপই ৷
এই মন্তব্য বৰপেটাৰ অগপ বিধায়ক গুনীন্দ্ৰ নাথ দাসৰ ৷ বিধায়ক গৰাকীয়ে জানিবলৈ দিয়া মতে জনীয়াত এতিয়া বিজেপিৰ বতাহ বলিছে ৷ সেয়ে উপ নিৰ্বাচনত অগপই প্ৰাৰ্থীত্ব প্ৰদান নকৰে ৷ তাৰ পৰিৰ্বতে বিজেপিৰ সপক্ষে বলা এই বতাহক কাৰ্যক্ষেত্ৰত পৰিণত কৰি যি কোনো প্ৰকাৰে বিজেপি প্ৰাৰ্থীক জয়ী কৰাবলৈ কঁকালত টঙালি বান্ধিছে বৰপেটা অগপই ৷
ইফালে এসময়ত জনীয়াত টিকট দিবলৈ প্ৰাৰ্থী বিচাৰি নোপোৱা বিজেপিৰ দলৰ পৰা প্ৰাৰ্থীত্ব বিচাৰি 36 জনে আবেদন কৰিছে ৷ আনকি সংখ্যালঘু অধ্যুষিত সমষ্টিটোত নতুনকৈ 27 হাজাৰ লোকে গ্ৰহণ কৰিছে বিজেপিৰ সদস্য পদ ৷ সেয়ে জনীয়া সমষ্টিতো দখলৰ বাবে সৰ্বশক্তি প্ৰয়োগেৰে উঠি পৰি লাগিছে বিজেপি ৷ অৱশ্যে বিজেপিৰ এই আশা কিমানদূৰ ফলপ্ৰসু হয় তাৰ উত্তৰলৈ নিশ্চয়কৈ বাট চাব লাগিব ৰাইজে ৷
