বৰপেটা,জনীয়া, 20 চেপ্তেম্বৰঃ এটা বিধ্বস্ত পথ,পথটোৱে জলাকলা খুৱাইছে অঞ্চলটোৰ ৰাইজক,বহুবাৰ চৰকাৰক আবেদন নিবেদন জনাইও সুফল নাপাই ধৈৰ্যৰ বান্ধ ছিঙি গ'ল ৰাইজৰ ৷ শুকুৰবাৰে ৰাজপথলৈ ওলাই আহিল ৰাইজ, ছাত্ৰ ছাত্ৰী ৷ এই ঘটনা বৰপেটা জিলাৰ জনীয়াৰ ৷
৮১ নং জনীয়া গাওঁ পঞ্চায়তৰ এলেকাধীন ৬নং ৱাৰ্ডৰ গ্ৰাম্য পথটোৰ জৰাজীৰ্ণ অৱস্থাৰ পৰা মুক্তি বিচাৰি ৰাইজে ভূঁই ৰুই প্ৰতিবাদ সাব্যস্ত কৰিলে শুকুৰবাৰে ৷ অতি পুৰণি পথটোৰে হাজাৰ হাজাৰ পথচাৰী অহা-যোৱা কৰে। বাঘবৰ ৰাজহ চক্ৰৰ কাৰ্যালয়,মন্দিয়া খণ্ড উন্নয়ন কাৰ্যালয়, শিক্ষা খণ্ডৰ কাৰ্যালয়,কেইবাখনো বিদ্যালয়ৰ ছাত্ৰ-ছাত্ৰীকে ধৰি হাজাৰ হাজাৰ মানুহে যাতায়াত কৰে পথছোৱাৰে ৷
বিভাগী কৰ্তৃপক্ষক বাৰম্বাৰ আবেদন কৰাৰ লগতে স্থানীয় বিধায়ক তথা বৰ্তমানৰ সাংসদ আব্দুল খালেককো বহুবাৰ পথটো মেৰামতিৰ বাবে ৰাইজে আহ্বান জনাইছিল যদিও কোনো সুফল নাপালে ৷ অৱশেষত উপায়ন্তৰ হৈ ৰাইজে ভূঁই ৰুই প্ৰতিবাদ জনাবলগীয়া পৰিস্থিতিৰ সৃষ্টি হয় ৷
কৃষক মুক্তি সংগ্ৰাম সমিতিৰ উদ্যোগত স্থানীয় ৰাইজ আৰু ভুক্তভোগী ছাত্ৰ ছাত্ৰীসকলে শুকুৰবাৰে পুৱা এক প্ৰতিবাদী কাৰ্যসূচী ৰূপায়ণ কৰাৰ লগতে চৰকাৰক শীঘ্ৰেই পথছোৱা মেৰামতি কৰাৰ দাবী জনাই ৷ এজাক বৰষুণ দিলেই বোকাময় হৈ পৰা পথছোৱাৰে বিদ্যালয়লৈ যাব নোৱাৰে অঞ্চলটোৰ ছাত্ৰ ছাত্ৰীসকল ৷
