বৰপেটা, 27 জুলাই : বৰপেটা জিলাৰ জনীয়া আৰু বাঘবৰ সমষ্টিত অব্যাহত আছে বানৰ সংহাৰ ৷ বাঘবৰ সমষ্টিৰ ঐতিহাসিক মান আৰু আহোমৰ শেষ ৰণস্থলী হাদীৰাচকীৰ, ইতিহাস গঢ়কা মইনবড়ী আৰু ফুলৰা চতলা, মইনবড়ী সত্ৰ, চিকাটাৰী, দীৱলদী, জয়পুৰ গাঁৱত এতিয়াও পানীৰ তলত শ শ পৰিয়ালৰ বাসগৃহ । ঘৰ বাৰী এৰি ওখ ঠাই, নাৱত আশ্ৰয় লৈছে বৰ্ণাত্যই । চৰকাৰ তথা প্ৰশাসনৰ চৰম অৱহেলাৰ বাবে বিগত এমাহ ধৰি পৰিয়ালসহ কেচুৱা লৈ গৰু, ম'হ, ছাগলী, ভেড়া, হাহঁ, কুকুৰা একেলগে আশ্ৰয় লৈ ইতৰ প্ৰাণীৰ দৰে জীৱন নিৰ্বাহ কৰিবলৈ বাধ্য হৈছে বানাক্ৰান্তই ৷ সীমাহীন দুখ কষ্টৰে অনিদ্ৰা অনাহাৰে দিন ৰাতি পাৰ কৰিছে এইসকল লোকে ।
খাদ্য সংকটত পৰি অঞ্চলকেইটাৰ বহুতো পশু মৃত্যু মুখত পৰিছে । বিশুদ্ধ খোৱাপানীৰ অভাৱত বানাক্ৰান্তই সেৱন কৰিবলৈ বাধ্য হৈছে নৈৰ লেতেৰা পানী ৷ যাৰ ফলত এওঁলোকৰ মাজত দিনে-দিনে দেখা দিছে বিভিন্ন বেমাৰে । বানপানীৰ প্ৰৱল সোঁতে ইতিমধ্যেই উটুৱাই নিছে বহুতৰে ঘৰ-দুৱাৰ, ভেটি-মাটিৰ লগতে পশুধন । এতিয়াও পানীৰ তলতে ডুবি আছে কৃষক সকলৰ হাজাৰ-হাজাৰ হেক্টৰ শস্যৰ কৃষিভূমি ।
লগতে পঢ়ক : মুখ্যমন্ত্ৰীৰ আগমনৰ পূৰ্বে কটকটীয়া নিৰাপত্তা ব্যৱস্থা ঐতিহাসিক চতিয়া থানাত
