জনীয়া, 18 আগষ্ট : কলগাছিয়া থানাৰ অন্তৰ্গত শওপুৰ কৰাৰকুৰত পোহৰলৈ আহিছে এক দুষ্কাৰ্য সংঘটিত হোৱাৰ ঘটনা ৷ বেকী নৈৰ(Beki River) দলঙৰ তলেৰে দিনে-নিশাই সংঘটিত হয় অনৈতিক কাৰ্য-কলাপ ৷ দলংখনৰ তলত থকা জয়েজৰ ওপৰ অংশত দলঙৰ সমপৰিমাণে দীঘলীয়া এটা সুৰংগ আছে । ঘাইপথ বা দলঙৰ পৰা এই সুৰংগটো সাধাৰণতে দেখা পোৱা নাযায় ৷
জানিব পৰা মতে, নৈ আৰু দলঙৰ সৌন্দৰ্য উপভোগ কৰিবলৈ অহা একাংশ যুৱকে সাধাৰণ লোকৰ চকুত ধূলি মাৰি সুৰংগৰ ভিতৰত সোমাই মদ, ভাং, আফিং আদি নিচাজাতীয় দ্ৰব্য সেৱন কৰে ৷ মঙলবাৰে এই দৃশ্য বন্দী হৈছে সাংবাদিকৰ কেমেৰাত ৷ ইয়াৰ পাচতে স্থানীয় ৰাইজে বিষয় সন্দৰ্ভত আৰক্ষীক খবৰ দিয়ে ৷
লগতে পঢ়ক : পুনৰ মহানগৰ আৰক্ষীৰ ফান্দত Drugs Peddler
সচেতন মহলে দলঙৰ সমীপত চোকা পহৰা দি যুৱ প্ৰজন্মক এনেকুৱা অনৈতিক কামৰ পৰা ৰক্ষা কৰিবলৈ কলগাছিয়া আৰক্ষীক আহ্বান জনায় ৷ ইয়াৰ লগতে ঠাইখিনি সৌন্দৰ্যকৰণ কৰি পৰ্যটনথলীলৈ উন্নীত কৰিবলৈও বৰপেটা জিলা প্ৰশাসন(Barpeta District Administration) আৰু অসম চৰকাৰক(Assam Govt) দাবী জনায় ৷
উত্তৰ শালমাৰাৰ পৰা আমিনগাঁও সংযোগী ৰাজ্যিক বিকল্প ঘাইপথত বেকী নৈত দলংখন নিৰ্মাণ হোৱাৰ পাচতে দৈনিক সহস্ৰাধিক ৰাইজে নৈ আৰু দলঙৰ সৌন্দৰ্য উপভোগ কৰিবলৈ যায় ৷ ইয়াৰ মাজতে একাংশই চলাই নিয়া এই অনৈতিক কৰ্ম-কাণ্ড শেহতীয়াকৈ বন্দী হৈছে সাংবাদিকৰ কেমেৰাত ৷ ইয়াৰ আগলৈকে এই কাণ্ডৰ বিষয়ে অজ্ঞাত হৈ আছিল বৰপেটা আৰক্ষী-প্ৰশাসন ৷ ঘটনাক লৈ অধিক চিন্তিত হৈ পৰিছে স্থানীয় সচেতন লোক ৷
লগতে পঢ়ক : অসম-অৰুণাচল সীমান্তত বিক্ৰীৰ বাবে নিয়া অৱস্থাত উদ্ধাৰ শিশু
