বৰপেটা, ওদালগুৰিত শোকাৱহ পথ দুৰ্ঘটনাত প্ৰাণ গ’ল তিনিজনৰ

ৰাজ্যৰ ভিন্ন প্ৰান্তত শোকাৱহ পথ দুৰ্ঘটনা ৷ বৰপেটাৰ তাৰাবাৰীৰ গণকপাৰাত এক ভয়ংকৰ পথ দুৰ্ঘটনাত থিতাতে নিহত হয় দুই বাইক আৰোহী  ৷ আনহাতে কলাগুৰু সংগীত মহোৎসৱ চলি থকাৰ মাজতে ওদালগুৰিৰ টংলা চহৰত সংঘটিত হয় এক ভয়ংকৰ পথ দূৰ্ঘটনা । চিলিণ্ডাৰ ভৰ্তি ট্ৰাকৰ খুন্দাত থিতাতে মৃত্যুক আঁকোৱালি লয় এজন যুৱকে।

বৰপেটা, 31 জানুৱাৰীঃ বৰপেটাত শোকাৱহ পথ দুৰ্ঘটনাই প্ৰাণ কাঢ়িলে দুজনৰ ৷ বৰপেটাৰ তাৰাবাৰীৰ গণকপাৰাত এক ভয়ংকৰ পথ দুৰ্ঘটনাত থিতাতে নিহত হয় দুই বাইক আৰোহী ৷ বৰপেটাৰ পৰা বহৰি অভিমুখে গৈ থকা অৱস্থাত পথৰ দাঁতিত থকা এডাল গছত খুন্দা মাৰি অচেতন হৈ পৰা বুলি জানিবলৈ দিয়ে স্থানীয় লোকে । দুৰ্ঘটনা সংঘটিত হোৱা হিৰো গ্লেমাৰ বাইকখনৰ নম্বৰ AS 01DQ4625 । নিহত যুৱক দুজন সৰ্থেবাৰী থানাৰ অন্তৰ্গত গৰেমাৰীৰ ক্ৰমে বিজু আলী- (২২) আৰু ৰহিম আলী- (২৪) বুলি জানিব পৰা গৈছে । উল্লেখ্যে যে স্থানীয় ৰাইজৰ সহায়ত আৰু তাৰাবাৰী আৰক্ষীৰ সহাযোগত চেঙা খণ্ড প্ৰাথমিক স্বাস্থ্য কেন্দ্ৰত ভৰ্ত্তি কৰে যদিও ঘটনাস্থলীতে মৃত বুলি ঘোষণা কৰে চিকিৎসক আব্দুল মতিনে । মৃতদেহ মৰণোত্তৰ পৰীক্ষাৰ বাবে বৰপেটা মেডিকেল কলেজলৈ লৈ প্ৰেৰণ কৰা হয় ।

ওদালগুৰিঃ কলাগুৰু সংগীত মহোৎসৱ চলি থকাৰ মাজতে ওদালগুৰিৰ টংলা চহৰত সংঘটিত হয় এক ভয়ংকৰ পথ দূৰ্ঘটনা । চিলিণ্ডাৰ ভৰ্তি ট্ৰাকৰ খুন্দাত থিতাতে মৃত্যুক আঁকোৱালি লয় এজন যুৱকে। মৃত যুৱকজন ডিমাকুছি শুকলাইৰ দ্বীপেন ৰবি দাস বুলি চিনাক্ত কৰা হৈছে । দ্বীপেন ৰবি দাসে টংলাৰ এখন ব্যক্তিগত ব্যৱসায় কেন্দ্ৰৰ কৰ্মচাৰী আছিল । স্কুতিৰে গৈ থকা অৱস্থাত চিলিণ্ডাৰ ভৰ্তি ট্ৰাক এখনে মহতিয়াই নিয়াত টংলাৰ মাজমজিয়াত কৰুণভাৱে মৃত্যুক আকোঁৱালি লয়। মহতিয়াই নিয়া ট্ৰাকখনৰ নম্বৰ As01 EC 4471 ৷ বৰ্তমান ট্ৰাকখন আৰক্ষীয়ে জব্দ কৰাৰ লগতে মৃতলোকজনক টংলা থানাৰ মৰ্গত ৰখা হৈছে।

আৰু পঢ়কঃবৰপেটাৰোডত তিনিখন বাইকসহ দুটা বাইক চোৰ আটক