বৰপেটাত বাইক-স্কুটিৰ মুখামুখি সংঘৰ্ষ

সংকটজনক অৱস্থাত তিনিজনক চিকিৎসালয়ত ভৰ্তি

বৰপেটা, 10 মে': বৰপেটাৰোডৰ খৈৰাবাৰীত শুকুৰবাৰ বাইক আৰু স্কুটিৰ মুখামুখি সংঘৰ্ষত তিনিজনকৈ লোক গুৰুতৰ ভাৱে আহত হয় ৷ শুকুৰবাৰে নিশা 9 বজাত সংঘটিত হয় এই পথ দুৰ্ঘটনা ৷ দুৰ্ঘটনাত আহত লোকসকল ক্ৰমে গয়াৰাম দাস, বাপন বিশ্বাস আৰু অজয় মণ্ডল ৷

আহত গয়াৰাম দাসৰ ঘৰ পাঠশালাৰ কটহবাৰীত আৰু আন দুজন আহত বাপন বিশ্বাস আৰু অজয় মণ্ডল বৰপেটাৰোডৰ খৈৰাবাৰীৰ বাসিন্দা বুলি জানিব পৰা গৈছে ৷ AS 15 F 7797 নম্বৰ বাইকেৰে আহি থকা সময়ত বিপৰীত দিশৰ পৰা গৈ থকা AS 14 H 2322 নম্বৰ স্কুটিৰ লগত হোৱা মুখামুখি সংঘৰ্ষৰ ফলত এই দুৰ্ঘটনা সংঘটিত হয় ৷ আহত লোকসকলক বৰপেটাৰোডৰ চিকিৎসালয়ত ভৰ্তি কৰোৱা হৈছে যদিও উন্নত চিকিৎসাৰ বাবে সংকটজনক অৱস্থাত বৰপেটা মেডিকেল কলেজলৈ প্ৰেৰণ কৰা হয় ৷