অন্ধবিশ্বাস !! দৈৱজ্ঞৰ বিধান অনুসৰি দুবাৰকৈ মনোনয়ন দাখিল কুমাৰ দীপক দাসৰ

নিৰ্বাচনৰ পূৰ্ৱেই আত্মবিশ্বাস হেৰুৱাইছে মিত্ৰজোঁটৰ প্ৰাৰ্থীয়ে । মঙ্গলবাৰে কোকৰাঝাৰ লোকসভা সমষ্টিৰ মিত্ৰজোঁটৰ প্ৰাৰ্থী প্ৰমিলাৰাণী ব্ৰক্ষ্মই শুভ লগ্ন চাই মনোনয় পত্ৰ দাখিল কৰাৰ পাছতে বুধবাৰে একেই পথকেই অলম্বন কৰিলে বৰপেটা লোকসভা সমষ্টিৰ অগপ মিত্ৰজোঁটৰ প্ৰাৰ্থী কুমাৰ দীপক দাসে । বৰঞ্চ কুমাৰ দীপক দাসে এখোপ ওপৰলৈ গৈ একেদিনাই দুবাৰকৈ দাখিল কৰিলে মনোনয়ন পত্ৰ ।

৪ এপ্ৰিল, বৰপেটাঃ বুধবাৰে বৰপেটা লোকসভা সমষ্টিত অগপৰ সভাপতি অতুল বৰা, বিজেপি সভাপতি ৰনজিৎ কুমাৰ দাস, মন্ত্ৰী চন্দ্ৰমোহন পাটোৱাৰী, বিপিএফৰ বিশ্বজিৎ দৈমাৰী, অগপ নেতা ভূপেন ৰয়ক লগত লৈ বিশাল সমদলেৰে আহি বৰপেটাৰ উপায়ুক্তৰ হাতত প্ৰথমখন মনোনয়ন দাখিল কৰিলে অগপ প্ৰাৰ্থী কুমাৰ দীপক দাসে ৷

দৈৱজ্ঞৰ লগ্ন অনুসৰি অগপ প্ৰাৰ্থী কুমাৰ দীপক দাসে আজি দিনৰ ঠিক 11 বজাত দাখিল কৰিছিল প্ৰথমখন মনোনয়ন ৷ দৈৱজ্ঞৰ বিধান অনুসৰন কৰিয়েই জিলা উপায়ুক্তৰ হাতত মনোনয়ন দাখিলৰ পিচতেই কুমাৰ দীপক দাস উপস্থিত হয় পৌৰ সভাৰ খেলপথাৰত ৷ পৌৰ সভাৰ খেলপথাৰৰ পৰা পুনৰ অতুল বৰা, ৰনজিৎ কুমাৰ দাস, মন্ত্ৰী চন্দ্ৰমোহন পাটোৱাৰী, বিশ্বজিৎ দৈমাৰী, ভূপেন ৰয়ৰ লগতে সহস্ৰাধিক সমৰ্থকৰে সমদল কৰি আহি পুনৰ দাখিল কৰে মনোনয়ন পত্ৰ ৷