ক’লা দেওবাৰঃৰাজ্যৰ ভিন্ন স্থানত সংঘটিত পথ দুৰ্ঘটনা

দেওবাৰৰ দিনটোত ৰাজ্যৰ পৃথক পৃথক স্থানত সংঘটিত হয় কেবাটাও পথ দুৰ্ঘটনা ৷ বকোৰ দুটাকৈ স্থানত সংঘটিত পথ দুৰ্ঘটনাৰ ফলত কেবাজনো ব্যক্তি আহত হয় ৷ আহত ব্যক্তিসকলক ইতিমধ্যে গুৱাহাটী মেডিকেল কলেজ হাস্পতালত ভৰ্তি কৰোৱা হৈছে ৷ বাক্সাতো সংঘটিত হয় এক পথ দুৰ্ঘটনা ৷ দুৰ্ঘটনাটোত আহত তিনিজন ব্যক্তিৰ অৱস্থা সংকটজনক বুলি জানিব পৰা গৈছে ৷ লগতে হাওৰাঘাটৰ গজালিপাৰত শনিবাৰে নিশা সংঘটিত এক শোকাবহ পথ দুৰ্ঘটনাত নিহত হয় এজন যুৱক । নিহত যুৱকজন হোজাইৰ চানু পাণিকা বুলি চিনাক্ত কৰা হৈছে ।

বকো,9 ফেব্ৰুৱাৰীঃ দেওবাৰৰ দিনটোত ৰাজ্যৰ পৃথক পৃথক স্থানত সংঘটিত হয় কেবাটাও পথ দুৰ্ঘটনা ৷ বকোৰ এক শিৱ মন্দিৰৰ সমীপত ১৭ নং ৰাষ্ট্ৰীয় ঘাইপথত দেওবাৰে সংঘটিত হয় এক ভয়াবহ পথ দুৰ্ঘটনা । এখন টাটা টিয়াগ’ (AS-15 Q 4965) আৰু টিভিএছ আপাছী (ML 08F 6149) বাইকৰ মুখামুখি সংঘৰ্ষৰ ফলত গুৰুতৰভাৱে আঘাতপ্ৰাপ্ত হয় বাইক আৰোহী আমিদুল চালাম । ব্যক্তিজনৰ ঘৰ গোৱালপাৰাৰ শালমাৰাত ৷ আঘাতপ্ৰাপ্ত চালামক বকো প্ৰাথমিক স্বাস্থ্যকেন্দ্ৰত ভৰ্তি কৰোৱা হয় যদিও উন্নত চিকিৎসাৰ বাবে সম্প্ৰতি গুৱাহাটী চিকিৎসা মহাবিদ্যালয় হাস্পতাললৈ প্ৰেৰণ কৰা হৈছে ৷

হাওৰাঘাটত নিহত এজন

আনহাতে, বকো থানাৰ অন্তৰ্গত লামপাৰাত সংঘটিত হয় অন্য এক দুৰ্ঘটনা ৷ ১৭ নং ৰাষ্ট্ৰীয় ঘাইপথেৰে বকো অভিমুখে আহি থকা এখন ৰ’নাল্ট ডাষ্টাৰ বাহনে পথত ৰখাই থোৱা ট্ৰাক এখনত পিছফালৰ পৰা খুন্দা মৰাৰ ফলত বকোৰ বিশিষ্ট ব্যৱসায়ী বিক্ৰম শৰ্মা গুৰুতৰভাৱে আহত হয় । ঘটনাস্থলীত বকো আৰক্ষী উপস্থিত হৈ ব্যক্তিজনক স্থানীয় বকো প্ৰাথমিক স্বাস্থ্যকেন্দ্ৰত ভৰ্তি কৰাই যদিও পৰৱৰ্তী সময়ত সংকটজনক অৱস্থাত উন্নত চিকিৎসাৰ বাবে ততাতৈয়াকৈ গুৱাহাটী মেডিকেল কলেজ হাস্পতাললৈ প্ৰেৰণ কৰে ৷ দুৰ্ঘটনাত পতিত বাহনখনৰ নম্বৰ হৈছে AS 01 DR 7599 ৷

বাক্সাঃ বাক্সাৰ তামুলপুৰত টেম্পো আৰু চুইফট ডিজায়াৰৰ মাজত মুখামুখি সংঘৰ্ষৰ ফলত আহত হয় ৮গৰাকী পুৰুষ-মহিলা ৷ তামুলপুৰ আৰক্ষী থানাৰ অন্তৰ্গত ৰঙিয়া-ভূটান ৰাষ্ট্ৰীয় ঘাইপথৰ বৰখোপাত সংঘটিত পথ দুৰ্ঘটনাটোত আহত তিনিগৰাকী যাত্ৰীৰ অৱস্থা গুৰুতৰ বুলি জানিব পৰা গৈছে ৷ ঘটনাৰ বিৱৰণী অনুসৰি,দেওবাৰে ৰঙিয়াৰ পৰা কুমাৰীকাটা অভিমুখে গৈ থকা টেম্পোখনত দ্বাৰকুছিৰ সুদামচা বড়ো(২৭),জলপাইগুৰীৰ প্ৰতিমা সৰকাৰ(২৩),পাৰুল সৰকাৰ(৪৫),গাৰোঘুটুৰ নাৰায়ণ দাস (৩৮),বিজয় দাস(৪৫),অমূল্য দাস(৪৩),বিনয়াপুৰৰ টিকেন পাল(৩৫) আৰু নগাঁও কামপুৰৰ দিপীকা নাগ(২২) আছিল ৷

ইফালে,দুৰ্ঘটনাটো সংঘটিত কৰি চুইফট ডিজায়াৰখনৰ চালকজনে ঘটনাস্থলীৰ পৰা পলায়ন কৰে । পিছত স্থানীয় লোক আৰু তামুলপুৰ আৰক্ষীয়ে আহতসকলক তামুলপুৰ প্ৰাথমিক চিকিৎসালয়ত ভৰ্তি কৰায় ৷ কিন্তু গুৰুতৰভাৱে আঘাতপ্ৰাপ্ত তিনিগৰাকী লোকক উন্নত চিকিৎসাৰ বাবে গুৱাহাটী চিকিৎসা মহাবিদ্যালয় হাস্পতাললৈ প্ৰেৰণ কৰে বুলি জানিব পৰা গৈছে ৷

ডিফুঃ হাওৰাঘাটৰ গজালিপাৰত শনিবাৰে নিশা সংঘটিত এক শোকাবহ পথ দুৰ্ঘটনাত নিহত হয় এজন যুৱক । নিহত যুৱকজন হোজাইৰ চানু পাণিকা বুলি চিনাক্ত কৰা হৈছে । জানিব পৰা মতে,হাওৰাঘাটৰ হাতীপোৰাত থকা শহুৰেকৰ ঘৰলৈ আহি থকা অৱস্থাত পথৰ দাঁতিত থকা এটা বিদ্যুতৰ খুঁটাত প্ৰচণ্ড জোৰেৰে খুন্দা মাৰি যুৱকজন দুৰ্ঘটনাত পতিত হয় ৷ হাওৰাঘাট আৰক্ষীৰ তহলদাৰী গোটে ততালিকে যুৱকজনক হাওৰাঘাট অসামৰিক চিকিৎসালয়ত ভৰ্ত্তি কৰায় যদিও চিকিৎসাধীন অৱস্থাত যুৱকজনৰ মৃত্যু হয় ।

লগতে চাওকঃবিদ্যালয়ৰ পাঠ্যক্ৰমত অন্তৰ্ভূক্ত হ'ল 'ভিলেজ ৰকষ্টাৰ্ছ