বাক্সাৰ কুমাৰীকাটাত আঢ়ৈ লাখ টকীয়া বাঁহৰ দল‌ং

বাক্সাত এখন আঢ়ৈ লাখ টকীয়া শৰাইঘাট দলঙৰ অনুৰূপ বাঁহৰ দলং নিৰ্মাণে ৰাইজৰ দৃষ্টি আকৰ্ষণ কৰিবলৈ সক্ষম হৈছে । এই দলংখন বৰ্তমান নিৰ্মাণৰ অৱস্থাত আছে জিলাখন ৫৮নং তামুলপুৰ বিধানসভা সমষ্টিৰ অন্তৰ্গত কুমাৰীকাটা-কাউলী সংযোগী পথৰ মটঙানদীৰ ওপৰত। তিনি খন গাঁৱৰ কেইবাজনো লোকে লগ লাগি গাঠিৰ ধন ভাঙি নিৰ্মাণ কৰিছে দলংখন ।

বাক্সা, 20 আগষ্টঃ বাক্সাত এখন আঢ়ৈ লাখ টকীয়া বাঁহৰ দলং নিৰ্মাণ কৰিলে ৰাইজে ৷ দীৰ্ঘদিন ধৰি চৰকাৰ তথা প্ৰশাসনক দলং খন নিৰ্মাণ কৰিবলৈ আহ্বান জনাইছিল যদিও কোনো ফলাফল নাপালে ৰাইজে ৷

বাক্সাত এখন আঢ়ৈ লাখ টকীয়া শৰাইঘাট দলঙৰ অনুৰূপ বাঁহৰ দলং নিৰ্মাণে ৰাইজৰ দৃষ্টি আকৰ্ষণ কৰিবলৈ সক্ষম হৈছে। এই দলংখন বৰ্তমান নিৰ্মাণৰত অৱস্থাত আছে ৷ ৫৮ নং তামুলপুৰ বিধানসভা সমষ্টিৰ অন্তৰ্গত কুমাৰীকাটা-কাউলী সংযোগী পথৰ মটঙানদীৰ ওপৰত সাজিছে এই দলংখন। দলংখন কোনো স্থানীয় জনপ্ৰতিনিধিয়ে আধাৰশিলা স্থাপন কৰি অথবা কোনো ধৰণৰ চৰকাৰী আঁচনীৰে নিৰ্মাণ কৰা নহয়। তিনিখন গাঁৱৰ কেইবাজনো লোকে লগলাগি গাঠিৰ ধন ভাঙি নিৰ্মাণ কৰি আছে দলংখন । ইতিমধ্যে আগতে নিৰ্মাণ কৰা দুখন বাঁহৰ দলং বাৰিষাৰ সোঁতে উটুৱাই নিয়ে।

স্থানীয় ৰাইজৰ অভিযোগ অনুসৰি তেওঁলোকে তিনিজনকৈ জনপ্ৰতিনিধিক উক্ত পথটোৰ মটঙানদীৰ ওপৰত দলং নিৰ্মাণৰ বাবে স্থানীয় লোকসকলে বহুবাৰ অনুনয় বিনয় কৰাৰ পিছতো কোনো ধৰণৰ গুৰুত্ব প্ৰদান নকৰিলে বুলি অভিযোগ কৰে। যাৰ বাবে অঞ্চলটোৰ ৰাইজ বছৰ বছৰ ধৰি যাতায়তৰ বাবে জীয়াতু ভুগিবলগীয়া হৈছে।অৱশেষত স্থানীয় লোকসকলে নিজৰ গাঠিৰ ধন আঢ়ৈ লাখ টকা খৰচ কৰি নিৰ্মাণ কৰে বহু দীঘলীয়া বাঁহৰ দলং। দলংখন এটা সপ্তাহৰ পিছতেই ৰাইজৰ বাবে মুকলি কৰি দিয়া হ'ব বুলি জনাইছে।