বাক্সা, 9 মে': ভাৰত-ভূটান সীমান্তৰ জনাঞ্চলত এটা বনৰীয়া হাতীৰ জাকে বিচৰণ কৰি ফুৰাত শংকিত হৈ পৰিছে স্থানীয় ৰাইজ ৷ বাক্সাৰ তামুলপুৰ মহকুমাৰ কুমাৰীকাটা ৰেঞ্জৰ ভাৰত-ভূটান সীমান্তৰ বগাজুলিত খাদ্যৰ সন্ধানত বনাঞ্চলৰ পৰা জনাঞ্চলৈ নামি অহা হাতীৰ জাকটোৱে বিগত কিছুদিন ধৰি বাহৰ পাতিছে ৷ বুধবাৰে নিশা হাতীৰ জাকটোয়ে পোৱালিসহ বগাজুলি বনাঞ্চলৰ পৰা আহি উত্তৰ কাৰখেলা গাঁৱত প্ৰৱেশ কৰি গোপী কাৰ্কী ,জিৎ বাহাদুৰ বুঢ়াথোকী, গংগাৰাম ভট্টৰায় নামৰ লোক কেইজনৰ বাৰীৰ নাৰিকল,তামোল গছ ভঙাৰ উপৰিও আনাৰস, মাকৈ খেতি তহিলং কৰে ৷
উল্লেখ্য যে জাকটোত প্ৰায় 21টা হাতী থকা বুলি অনুমান কৰা হৈছে ৷ বৃহস্পতিবাৰে পুৱাৰ ভাগত হাতীৰ জাকটোৱে বগাজুলিৰ ফালে উভতি নগৈ শান্তিপুৰ গাঁৱৰ বাহনি আৰু গমাৰি বাগানৰ মাজত বৰ্তমানেও বাহৰ পাতি আছে ৷ ফলত আতংকিত হৈ পৰিছে গাঁৱখনৰ ৰাইজ ৷ আনহাতে, কুমাৰীকাটা বন বিভাগৰ বিষয়া-কৰ্মচাৰীসকল গাঁৱখনত উপস্থিত হৈ হাতীৰ জাকটো নিৰীক্ষণ কৰি আছে যদিও নিশা স্থানীয় ৰাইজে হাতীৰ বাবে ভয়-শংকাত থাকিবলগীয়া হৈছে ৷ বন বিভাগৰ কৰ্মচাৰীয়ে হাতীৰ জাকটোৰ গতিবিধি লক্ষ্য কৰি জাকটো ভূটান পাহাৰৰ পিনে খেদিবলৈ চেষ্টা অব্যাহত ৰাখিছে ৷
