স্পৰ্টছ ডেস্ক, 13 জানুৱাৰীঃ গুৱাহাটীত চলি থাক খেল’ ইণ্ডিয়া যুৱ গেমছৰ তৃতীয় দিনৰ অন্তত গুজৰাট দলটোৱে বৰ্তমান লৈকে ৫ টা সোণ, ৫ টা ৰূপ আৰু ৫ টা ব্ৰঞ্জৰ পদকেৰে মুঠ 15 টা পদক লাভ কৰিবলৈ সক্ষম হৈছে । ইয়াৰে জুড’ ৪০ কে জি শাখাত অংকিতা নাগহেৰা, ৪৪ কেজি শাখাত সোণাল দনদিয়া, ৪৮ কেজি শাখাত চাহিন দাৰ্জেদা, ৬৩ কেজিত সন্ধিয়া ৰাথোৰে সোণৰ পদক লাভ কৰাৰ বিপৰীতে ৫০০০ মিটাৰ দৌৰ (২১ অনুৰ্ধ্বৰ) প্ৰতিযোগিতাত অজিত কুমাৰে সোণৰ পদক অৰ্জন কৰি ৰাজ্যখনলৈ গৌৰৱ কঢ়িয়াবলৈ সক্ষম হৈছে।
এইবাৰৰ খেল’ ইণ্ডিয়াত অধিক পদৰে শীৰ্ষ দহটা স্থানত অৱতীৰ্ণ হ'বলৈ সক্ষম হ'ব বুলি আশাবাদী গুজৰাটৰ খেলুৱৈ তথা প্ৰশিক্ষকসকল। ইফালে খেল’ ইণ্ডিয়াৰ আয়োজন প্ৰক্ৰিয়াকলৈ খুবেই সুখী গুজৰাটৰ দলটো । উল্লেখযোগ্য যে, ৰাজ্যখনৰ মুঠ ১৭৮ গৰাকী খেলুৱৈয়ে ২০ টাকৈ ইভেন্টত অংশগ্ৰহণ কৰিছে।
আনহাতে দিল্লী দলটোৱে দেওবাৰে জুড’ত দুটাকৈ আৰু 3000 মিটাৰ দৌৰত এটা সোণৰ পদক লাভ কৰিবলৈ সক্ষম হয় ৷ ছোৱালীৰ 17 অনুৰ্ধ্বৰ 63 কেজি শাখাত নন্দিনী ভাটছে অসমৰ ধৰিত্ৰী সোণোৱালক পৰাস্ত কৰি আৰু ধীৰাজে ল’ৰা 17 অনুধৰ্ব শাখাৰ 81 কিলোগ্ৰাম শাখাত সোণৰ পদক অৰ্জন কৰিবলৈ সক্ষম হয় ৷
ইপিনে শনিবাৰে জুড’ত দিল্লীৰ হৈ প্ৰথমটো সোণৰ পদক লাভ কৰিছিল তান্সিকা ট’কাছে ৷ বৰ্তমান দিল্লীয়ে 8 টা সোণ, 6 টা ৰূপ আৰু 9 টা ব্ৰঞ্জ পদকেৰে খেল’ ইণ্ডিয়াৰ পদক তালিকাত দ্বিতীয় স্থান দখল কৰিবলৈ সক্ষম হৈছে ৷
