স্পৰ্টছ ডেস্ক, 13 জানুৱাৰীঃ গুৱাহাটীত চলি থকা খেল’ ইণ্ডিয়া য়ুথ গেমছ 2020 ত অসমলৈ প্ৰথমটো স্বৰ্ণ পদক কঢ়িয়াই আনিলে পূজা বসুমতাৰীয়ে । ছোৱালীৰ 17 বছৰ অনুৰ্ধ্বৰ 57 কেজি শাখাৰ জুড’ খেলত এই পদক লাভ কৰে কাৰ্বি আংলঙৰ পূজাই । ফাইনেলত উত্তৰাখণ্ডৰ প্ৰতিদ্বন্দী স্নেহা চৌহানক 1-0 ব্যৱধানত পৰাস্ত কৰি অসমৰ বাবে প্ৰথমটো স্বৰ্ণ পদক আঁজুৰি আনিবলৈ সক্ষম হয় পূজা বসুমতাৰী । দেওবাৰে গুৱাহাটীৰ চাই চেন্টাৰত অনুষ্ঠিত হৈছিল এই জুড’ প্ৰতিযোগিতাৰ ফাইনেল মেচখন ৷
অৱশ্যে ছোৱালীৰ 17 অনুৰ্ধ্বৰ 63 কেজি শাখাৰ জুড’ৰ ফাইনেলত পৰাস্ত হৈ ৰূপৰ পদকতেই সন্তুষ্ট থাকিবলগীয়া হয় ডিব্ৰুগড়ৰ ধৰিত্ৰী সোণোৱাল। দিল্লীৰ নন্দিনী ভাটছৰ হাতত পৰাজয়বৰণ কৰে ধৰিত্ৰীয়ে ৷ ইয়াৰ পূৰ্বে উপাশা তালুকদাৰে জিমানাষ্টিকত এটা ৰূপ আৰু দুটা ব্ৰঞ্জৰ পদক অৰ্জন কৰি অসমলৈ গৌৰৱ কঢ়িয়াই আনিবলৈ সক্ষম হৈছিল ।
তৃতীয় দিনৰ খেলৰ অন্তত মহাৰাষ্ট্ৰ শীৰ্ষ স্থান দখল কৰাৰ বিপৰীতে অসমে 1 টা সোণ, 2 টা ৰূপ, 3 টা ব্ৰঞ্জ পদকেৰে অষ্টাদশ স্থান লাভ কৰিবলৈ সক্ষম হৈছে ৷
