স্পৰ্টছ ডেস্ক,24 আগষ্ট : ভাৰতীয় ডিফেণ্ডাৰ হৰমনপ্ৰীত সিঙে অলিম্পিক টেষ্ট ইভেন্টত চেম্পিয়নৰ খিতাপ দখল কৰাৰ পাছতে টুৰ্ণামেন্ট সম্পৰ্কত মন্তব্য আগবঢ়াইছে ৷ বুধবাৰে এই টুৰ্ণামেন্টৰ ফাইনেলত নিউজিলেণ্ডক 5-0ৰ ব্যৱধানত পৰাস্ত কৰে ভাৰতীয় পুৰুষ হকী দলটোৱে ৷
ইতিমধ্যে ভাৰতত আহি উপস্থিত হোৱা দলটোৰ অধিনায়ক হৰমনপ্ৰীতে মন্তব্য কৰে যে,এয়া দলৰ অৰ্হতাসম্পন্ন সদস্যসকলৰ বাবে নিজক প্ৰমাণ কৰি দেখুওৱাৰ এক সুন্দৰ সুযোগ আছিল ৷ জাপান,মালয়েছিয়া আৰু নিউজিলেণ্ডৰ দৰে দলৰ বিৰুদ্ধে ভাল প্ৰদৰ্শন কৰিবলৈ সক্ষম হোৱাৰ লগতে ভাৰতীয় দলটোক প্ৰথমবাৰৰ বাবে নেতৃত্ব প্ৰদান কৰিবলৈ পাই গৰ্বিত বুলি মন্তব্য কৰে হৰমনপ্ৰীতে ৷
উল্লেখ্য যে, 2015 চনৰ মে'ত ভাৰতৰ হৈ ভূৱনেশ্বৰত অনুষ্ঠিত টেষ্ট ছিৰিজত জাপানৰ বিৰুদ্ধে আত্মপ্ৰকাশ ঘটাইছিল হৰমনপ্ৰীতে ৷ ইয়াৰ পাছতে ভাৰতৰ হৈ বহুকেইখন গুৰুত্বপূৰ্ণ মেচত অংশগ্ৰহণ কৰিছে তেওঁ ৷ 2016 আৰু 2018 চনত FIH চেম্পিয়নছ ট্ৰফী, 2018 চনত কমনৱেলথ গেমছ, 2018 চনত এছিয়ান গেমছ আৰু 2018 চনত ওড়িশা হকী পুৰুষ বিশ্বকাপত অংশগ্ৰহণ কৰিছিল হৰমনপ্ৰীতে ৷
