স্পৰ্টছ ডেস্ক, 1 এপ্ৰিল : 2023 চনৰ ফিফা মহিলা বিশ্বকাপ আয়োজন কৰিবৰ বাবে অষ্ট্ৰেলিয়া আৰু নিউজিলেণ্ডৰ 9 খন উদ্যোক্তা চহৰৰ দহখন খেলপথাৰ বৃহস্পতিবাৰে ঘোষণা কৰে আন্তৰাষ্ট্ৰীয় ফুটবলৰ পৰিচালনা সংস্থা চমুকৈ ফিফাই ৷
বিশ্বৰ বহু শ্ৰেষ্ঠ খেলুৱৈয়ে অষ্ট্ৰেলিয়া আৰু নিউজিলেণ্ডৰ খেলপথাৰ সমূহত খেলত অংশগ্ৰহণ কৰিবলৈ হাতত মাত্ৰ দুবছৰ সময় আছেগৈ, স্বাভাৱিকতেই চহৰ সমূহৰ ঘোষণাই বিশ্বৰ বহু ফুটবল অনুৰাগী আৰু খেলুৱৈ সকলৰ বাবে যথেষ্ট গুৰুত্ব বহন কৰিছে ৷ লগতে 2023 চনৰ মহিলা ফুটবল বিশ্বকাপেই হ’ব সহ-আয়োজন কৰা প্ৰথমখন মহিলা ফুটবল বিশ্বকাপ য’ত 32 টাকৈ দলে অংশগ্ৰহণ কৰিব ৷
ক্ৰীড়াৰ এই ৰণাংগনৰ উদ্যোক্তা চহৰ আৰু খেলপথাৰ সমুহ হ'ল- এডিলেইডৰ হিন্দমাৰ্শ্ব ষ্টেডিয়াম, অকলেণ্ড/তামাকী মাকুৰাউ ইডেন পাৰ্ক, ব্ৰিচবেনৰ ব্ৰিচবেন ষ্টেডিয়াম, ডুনেডিনও/টেপোটিৰ ডুনেডিন ষ্টেডিয়াম, হেমিল্টন/কিৰিকিৰিৰোয়াৰ ৱাইকাটো ষ্টেডিয়াম, মেলবর্নৰ মেলবর্ন আয়ত ষ্টেডিয়াম, পাৰ্থৰ পাৰ্থ আয়তাকাৰ ষ্টেডিয়াম, চিডনীৰ ষ্টেডিয়াম অষ্ট্ৰেলিয়া আৰু চিডনী ফুটবল ষ্টেডিয়াম, ৱেলিংটন, তে-হাংগুই-আ-তাৰাৰ ৱেলিংটন ষ্টেডিয়াম।
চহৰ আৰু ষ্টেডিয়াম সমূহ প্ৰকাশ কৰাৰ উপৰিও, অকলেণ্ডৰ ইডেন পাৰ্কে আৰম্ভণি খেল আয়োজন কৰাৰ লগতে চিডনীৰ ষ্টেডিয়াম অষ্ট্ৰেলিয়াই ফাইনেল আয়োজন কৰিব বুলিও ঘোষণা কৰিছে ফিফাই । অষ্ট্ৰেলিয়া আৰু নিউজিলেণ্ড দুয়ো দেশে এই বছৰৰ শেষৰ ভাগত সময়সূচী ঘোষণা হ'বলগীয়া মহিলা বিশ্বকাপ 2023ৰ এখনকৈ পূৰ্ণ দৈঘ্যৰ ছেমি ফাইনেল খেলৰো আয়োজন কৰিব।
আয়োজনকাৰী চহৰসমূহ নিৰ্বাচনৰ বিষয়ে বক্তৃতা দি ফিফাৰ সভাপতি জিয়ানি ইনফণ্টিনোয়ে কয়: "9 খন উদ্যোক্তা চহৰৰ নিৰ্বাচনে পৰৱৰ্তী মহিলা ফুটবল বিশ্বকাপ 2023 ৰ বাবে মাইলৰ খুঁটি হিচাপে বিবেচিত হ’ব, লগতে অষ্ট্ৰেলিয়া, নিউজিলেণ্ড আৰু সমগ্ৰ বিশ্বৰ খেলুৱৈ আৰু ফুটবল অনুৰাগীসকলৰ বাবেও ই যথেষ্ট তাৎপৰ্য বহন কৰিব। ফ্ৰান্স 2019 ৰ অভুতপূৰ্ব সফলতাৰ পিছত অষ্ট্ৰেলিয়া আৰু নিউজিলেণ্ডৰ 9 খন উদ্যোক্তা চহৰে কেৱল বিশ্বৰ শ্ৰেষ্ঠ খেলুৱৈসকলৰ প্ৰদৰ্শনেই নকৰে, মহিলা ফুটবল বিশ্বকাপে মানুহক একত্ৰিত আৰু অনুপ্ৰাণিত কৰাৰ লগতে জীৱন সলনি কৰিবলৈ আৰু অষ্ট্ৰেলিয়া, নিউজিলেণ্ড আৰু সমগ্ৰ বিশ্বত মহিলা ফুটবলৰ বাবে এক স্থায়ী উত্তৰাধিকাৰ সৃষ্টি কৰিবলৈ সক্ষম হ’ব।"
ফিফাই উদ্যোক্তা চহৰ আৰু ষ্টেডিয়াম সমূহৰ বাছনিৰ আগতে যোৱা 8 মাহ ধৰি ব্যাপকভাৱে অনুসৰণ প্ৰক্ৰিয়া চলাইছিল উদ্যোক্তা সংগঠন সমুহৰ সৈতে য'ত সকলো উদ্যোক্তা চহৰ আৰু ষ্টেডিয়ামৰ সৈতে ভাৰ্চুৱেল কৰ্মশালাৰ শৃংখলা অন্তৰ্ভুক্ত আছিল, লগতে উদ্যোক্তা চহৰ আৰু ষ্টেডিয়ামৰ আন্তঃগাঁথনি আৰু সা-সুবিধা, প্ৰশিক্ষণ স্থান আৰু অতিথি সকল থকা স্থান সমূহৰ এক গভীৰ বিশ্লেষণ কৰা হৈছিল।
লগতে পঢ়ক : বিশ্বকাপৰ এছিয়ান যোগ্যতাত জাপানৰ হাতত ১৪ গ'লত পৰাস্ত মংগোলিয়া
