Rohit Sharma record: এদিনীয়া বিশ্বকাপত সৰ্বাধিক ছিক্সাৰ কোবোৱা খেলুৱৈৰ অভিলেখ ৰচিলে ৰোহিত শৰ্মাই

ভাৰতৰ অধিনায়ক ৰোহিত শৰ্মাই নিজৰ ডায়েৰীত আৰু দুটা অভিলেখ সংযোজন কৰিলে । বুধবাৰে বিশ্বকাপ আৰু বিশ্বকাপৰ একক সংস্কৰণত সৰ্বাধিক ছয় কোবোৱাৰ অভিলেখ ৰচি ক্ৰীছ গেইলক অতিক্ৰম কৰে ৰোহিতে । নিউজীলেণ্ডৰ বিৰুদ্ধে খেলা ক্ৰিকেট বিশ্বকাপৰ প্ৰথমখন ছেমি ফাইনেলত শৰ্মাই চাৰিটা ছয় কোবাইছিল ।

স্প’ৰ্টছ ডেস্ক, ১৫ নৱেম্বৰ: এটা ছন্দত থকা ভাৰতৰ অধিনায়ক ৰোহিত শৰ্মাই ৱেষ্ট ইণ্ডিজৰ ক্ৰীছ গেইলক অতিক্ৰম কৰি সামগ্ৰিকভাৱে আইচিচি ক্ৰিকেট বিশ্বকাপত সৰ্বাধিক ছয় সংগ্ৰহ কৰে । এদিনীয়া বিশ্বকাপৰ একক সংস্কৰণত ক্ৰীছ গেইলৰ সৰ্বাধিক ছয়ৰ অভিলেখো ভংগ কৰে ‘হিটমেন’গৰাকীয়ে ।

মুম্বাইৰ আইকনিক ৱাংখেড়ে ষ্টেডিয়ামত নিউজীলেণ্ডৰ বিৰুদ্ধে খেলা আইচিচি ক্ৰিকেট বিশ্বকাপৰ প্ৰথমখন ছেমি ফাইনেলত এই মাৰ্জিত সোঁহতীয়া বেটছমেনগৰাকীয়ে দুয়োটা কৃতিত্ব অৰ্জন কৰে ।

ক্ৰীছ গেলে বিশ্বকাপত ৪৯টা ছয় আৰু একক সংস্কৰণত (২০১৫) ২৬ টা ছয় কোবাইছে । ঘৰুৱা চাৰ্কিটত মুম্বাইৰ হৈ খেলা ৰোহিতে এতিয়া বিশ্বকাপত ৫১ টা ছয় আৰু একক সংস্কৰণত (২০২৩) ২৮ টা ছয় কোবাইছে ।