স্পৰ্টছ ডেস্ক, 22 জুনঃ এক ক্ৰিকেট কাৰ্যক্ৰমত প্ৰাক্তন ক্ৰিকেটাৰ গৌতম গম্ভীৰৰ ভাৰতৰ প্ৰাক্তন অধিনায়ক ৰাহুল দ্ৰাৱিড়কলৈ গুৰুত্বপূৰ্ণ মন্তব্য় । ৰাহুল দ্ৰাৱিড়ৰ পৰিসংখ্য়াৰ পৰাই জনা যায় যে, তেওঁ কিমান আণ্ডাৰৰেটেত খেলুৱৈ আৰু আণ্ডাৰৰেটেত এজন অধিনায়ক বুলি উল্লেখ কৰে গৌতম গম্ভীৰে ।
গম্ভীৰে কয়, মই মোৰ এদিনীয়া ক্ৰিকেটত সৌৰভ গাংগুলীৰ নেতৃত্বত আৰু টেষ্ট ক্ৰিকেটত ৰাহুল দ্ৰাৱিড়ৰ নেতৃত্বত অভিষেক কৰিছিলো । এইয়া অতিকৈ দুৰ্ভাগ্যজনক যে, আমি দ্ৰাৱিড়ক অধিনায়ক হিচাপে অধিক কৃতিত্ব প্ৰদান নকৰো । আমি কেৱল সৌৰভ গাংগুলী আৰু মহেন্দ্ৰ সিং ধোনীৰ কথা আলোচনা কৰো । এতিয়া আমি বিৰাট কোহলিৰ প্ৰসংগ উত্থাপন কৰো । কিন্তু ৰাহুল দ্ৰাৱিড়ো ভাৰতীয় দলৰ এজন সুন্দৰ অধিনায়ক আছিল ।
তেওঁৰ পৰিসংখ্যাৰ পৰাই অনুমান কৰিব পাৰি যে, তেওঁ কিমান আণ্ডাৰৰেটেত খেলুৱৈ আৰু অণ্ডাৰৰেটেত অধিনায়ক আছিল । তেওঁৰ নেতৃত্বতেই ভাৰতে ইংলেণ্ড আৰু ৱেষ্ট ইণ্ডিজৰ ভূমিত বিজয়ী হোৱাৰ লগতে ধাৰাবাহিক 14 অথবা 15 খন মেচত জয় লাভ কৰিবলৈ সক্ষম হৈছিল ।
দ্ৰাৱিড়ৰ অধিনায়কত্বৰ বাবে আমি তেওঁক অধিক কৃতিত্ব প্ৰদান কৰা নাই : গম্ভীৰ গম্ভীৰে লগতে কয়, এজন ক্ৰিকেটাৰ হিচাপে তেওঁক টেষ্ট ক্ৰিকেটত অ'পেন কৰিবলৈ কোৱা হৈছিল, তেওঁ কৰিছিল । তৃতীয় নম্বৰত খেলিবলৈ কোৱা হৈছিল, তেওঁ খেলিছিল । তেওঁক উইকেটকিপীঙৰ দায়িত্বও দিয়া হৈছিল, তেওঁ সেইয়াও গ্ৰহণ কৰিছিল । আনকি তেওঁক এজন ফিনিচাৰৰ ভূমিকা পালন কৰিবলৈ কোৱা হৈছিল, তেওঁ সেইয়াও কৰিছিল । তেওঁক যি যি কোৱা হৈছে তেওঁ সকলো কৰিছে । সেয়ে তেওঁ এজন উপযুক্ত আদৰ্শ খেলুৱৈ । মোৰ মতে তেওঁৰ প্ৰভাৱ যথেষ্ট বেছি আছিল বুলি উল্লেখ কৰে গম্ভীৰে ।
গম্ভীৰে ইয়াৰ ওপৰি কয় যে, সৌৰভ গাংগুলী এজন ফ্লেমবয়েণ্ট (flamboyant) আছিল, যাৰ বাবে এদিনীয়া ক্ৰিকেটত তেওঁৰ প্ৰভাৱ বেছি আছিল । যদি সকলো চোৱা যায় তেন্তে দ্ৰাৱিড়ৰ প্ৰভাৱ অধিক আছিল । দ্ৰাৱিড়ৰ প্ৰভাৱৰ তুলনা শচীন তেণ্ডুলকাৰৰ দৰে খেলুৱৈৰ সৈতে কৰিব পাৰি । যিয়ে সম্পূৰ্ণ জীৱন শচীনৰ চত্ৰ-ছায়াতে খেলিছে কিন্তু প্ৰভাৱৰ ক্ষেত্ৰত সম-পৰ্যায়ৰ আছিল ।
