স্পৰ্টছ ডেস্ক, 12 নৱেম্বৰ : ভাৰতৰ বিৰুদ্ধে অনুষ্ঠিত হ'বলগা আগন্তুক টি-20 ছিৰিজত ব্যতিক্ৰমী ৰূপত আত্মপ্ৰকাশ কৰিব অষ্ট্ৰেলিয়ান ক্ৰিকেট দলে ৷ দলটোৱে পৰিধান কৰিব আদিবাসী শিল্পকলা খচিত জাৰ্ছী ৷ সদা পৰিহিত সেউজীয়া আৰু সোণ বৰণীয়া জাৰ্ছীৰ পৰিৱৰ্তে দলৰ খেলুৱৈসকলে পৰিধান কৰিব দেশখনৰ আদিবাসী লোকসকলৰ আদিবাসী শিল্পখচিত জাৰ্ছী ৷
এই জাৰ্ছী পৰিধান কৰা সম্পৰ্কত অষ্ট্ৰেলিয়ান ফাষ্ট বলাৰ মিটচেল ষ্টাৰ্কে কয় যে, এই ডিজাইনৰ জৰিয়তে অষ্ট্ৰেলিয়াৰ ক্ৰিকেট ইতিহাস বিশ্ববাসীৰ সন্মুখত প্ৰতিনিধিত্ব কৰিবলৈ পাই তেওঁ সঁচাকৈ গৌৰৱাম্বিত ৷
1868 চনত এটা আদিবাসী ক্ৰিকেট দলে সাগৰেৰে অষ্ট্ৰেলিয়াৰ পৰা গ্ৰেট ব্ৰিটেইনলৈ তিনিমাহৰ ভ্ৰমণত গৈছিল ৷ এই দলটোৱে বিশ্বৰ কেইখনমান খ্যাতনামা ক্ৰিকেট গ্ৰাউণ্ডত 47 খনকৈ মেচত অংশগ্ৰহণ কৰিছিল ৷
জাৰ্ছীটোত থকা শিল্পকলাই আদিবাসী ক্ৰিকেটাৰৰ অতীত, বৰ্তমান আৰু ভৱিষ্যতক প্ৰকাশ কৰাৰ লগতে ডাঙৰ চক্ৰকেইটাই লৰ্ডছ ক্ৰিকেট গ্ৰাউণ্ড আৰু সৰু চক্ৰকেইটাই সেই ভ্ৰমণত দলটোয়ে বিভিন্ন ঠাইত সন্মিলিত হোৱা ঠাইসমূহক সূচাইছে ৷
লগতে পঢ়ক : ভাৰত বনাম অষ্ট্ৰেলিয়াঃ বিৰাট কোহলীৰ অনুপস্থিতিয়ে কোনটো চেনেলক ক্ষতি কৰিব ?
