স্পৰ্টছ ডেস্ক, ১৭ মে': দেশত বৰ্তমানো অব্যাহত আছে কৰ'ণা ভাইৰাছৰ বিভীষিকা ৰূপ । আনহাতে ভাৰতৰ ভিতৰতেই আটাইতকৈ বেছি সংক্ৰমিত ৰাজ্যখন হৈছে মহাৰাষ্ট্ৰ । শেহতীয়াকৈ মুম্বাই ক্ৰিকেট এশ্ব'চিয়েছনে ব্ৰিহানমুম্বাই পৌৰনিগমক ৱাংখাড়ে ষ্টেডিয়ামক COVID-১৯ ৰ কোৱাৰেণ্টাইন স্থলীলৈ ৰূপান্তৰিত কৰাৰ এক প্ৰস্তাৱ দাঙি ধৰাৰ এক সম্ভাৱনা প্ৰকট হৈছে ।
শেহতীয়াকৈ মুম্বাই ক্ৰিকেট এশ্ব'চিয়েছনৰ পৰা এটা সংবাদ এজেঞ্চীক কয় যে, ব্ৰিহানমুম্বাই পৌৰনিগমৰ পৰা এক অনানুষ্ঠানিক আহ্বান লাভ কৰিছিল মুম্বাই ক্ৰিকেট এশ্ব'চিয়েছনে । য'ত ৱাংখাড়ে ষ্টেডিয়ামক কোৱাৰেণ্টাইন কেন্দ্ৰলৈ ৰূপান্তৰিত কৰাৰ কথা উল্লেখ কৰা হৈছিল । সেই সন্দৰ্ভত মুম্বাই ক্ৰিকেট এশ্ব'চিয়েছনৰ সদস্য সকলৰ সৈতে হোৱা আলোচনাৰ পাচতেই মুম্বাই ক্ৰিকেট এশ্ব'চিয়েছনে সহায়ৰ সন্মতি দিয়াৰ সিদ্ধান্ত গ্ৰহণ কৰিছে বুলি জানিবলৈ দিয়ে ।
পূৰ্বতে ১৮৯৭ মহামাৰী আইনৰ অধীনত ব্ৰিহানমুম্বাই পৌৰনিগমৰ অধ্যক্ষৰ দ্বাৰা জাৰি কৰা নিৰ্দেশাৱলীৰ অনুসৰিয়ে ৱাংখাড়ে ষ্টেডিয়ামক হস্তান্তৰ কৰাৰ বাবে মুম্বাই ক্ৰিকেট এশ্ব'চিয়েছনলৈ এক পত্ৰ প্ৰেৰণ কৰিছিল ব্ৰিহানমুম্বাই পৌৰনিগমে ।
মহাৰাষ্ট্ৰত বৰ্তমানলৈকে ৩০,৭০৬ জন লোক আক্ৰান্ত হোৱাৰ বিপৰীতে মৃত্যুমুখত পৰিছে ১,১৩৫ জনকৈ লোক । আনহাতে মুম্বাইতো দিনক-দিনে বৃদ্ধি পাইছে আক্ৰান্তৰ সংখ্য়া ।
ইয়াৰ পূৰ্বে বলীউডৰ বাদশ্বাহ শ্বাহৰুখ খান আৰু গৌৰি খানে তেওঁলোকৰ কাৰ্যালয়ৰ মুকলি ঠাইখিনি বিএমচিলৈ কোৱাৰেণ্টাইনৰ বাবে প্ৰদান কৰিছিল ।
