স্পৰ্টছডেস্ক,23অক্টোবৰঃ ঘৰৰ মাটিত অপ্ৰতিৰোধ্য ভাৰতীয় দলে প্ৰথমবাৰলৈ টেষ্টত হোৱাইটৱাশ্ব কৰিলে বিধ্বংসী দক্ষিণ আফ্ৰিকাক ৷ ইয়াৰ পাচতে চলিত বৰ্ষৰ 3 নবেম্বৰৰ পৰা ভাৰতৰ মাটিত ভাৰত-বাংলাদেশৰ মাজত অনুষ্ঠিত হ'বলগীয়া টি-20 আৰু টেষ্ট শৃংখলাটোত ভাৰতীয় দলে টেষ্ট মেচৰ এই জয়যাত্ৰা অব্যাহত ৰখাৰ চেষ্টা কৰিব ৷ বাংলাদেশ দলটোৰ ভাৰত ভ্ৰমণত অনুষ্ঠিত হ'ব 3 খন টি-20 আৰু 2 খনকৈ টেষ্ট মেচ ৷ ইয়াৰে দ্বিতীয়খন টেষ্ট মেচ 22 নবেম্বৰত অনুষ্ঠিত হ'ব কলকাতাৰ ইডেন গাৰ্ডেনত ৷ কিন্তু এই খিনিতে মন কৰিবলগীয়া যে ক্ৰিকেট এচোচিয়েশ্বন অফ বংগাল চমুকৈ চিএবিয়ে ভাৰত-বাংলাদেশৰ এই টেষ্ট মেচখনত টিকটৰ মাননি সৰ্বনিম্নলৈ হ্ৰাস কৰিছে ৷ বিশেষকৈ টেষ্ট খেলত দৰ্শকৰ সহাৰি বৃদ্ধি কৰাৰ উদ্দেশ্য আগত ৰাখি এই সিদ্ধান্ত গ্ৰহণ কৰা বুলি মন্তব্য কৰিছে চিএবিৰ অধ্যক্ষ অভিষেক ডালমিয়াই ৷ যাৰ বাবে পূৰ্বে নিৰ্ধাৰিত 200, 150 আৰু 100 টকা মূল্যৰ টিকট বৰ্তমান ক্ৰিড়াপ্ৰেমীসকলে লাভ কৰিব 150, 100 আৰু মাত্ৰ 50 টকাৰ বিনিময়ত ৷
উল্লেখ্য যে ভাৰত আৰু দক্ষিণ আফ্ৰিকাৰ মাজত হৈ যোৱা টেষ্ট শৃংখলাৰ অন্তিমখন টেষ্ট মেচক লৈ দৰ্শকৰ মাজত দেখা গৈছিল অনীহা ৷ যাৰ বাবে এই মেচখনৰ মুঠ 5000 হাজাৰ টিকট পেৰা মিলিটেৰী ফৰ্ছ, আৰ্মী, স্থানীয় আৰক্ষী আৰু নেশ্বনেল কেডেট ক্ৰপ্ছক বিনামূলীয়াকৈ বিতৰণ কৰা হৈছিল ৷
