স্পৰ্টছ ডেস্ক, 8 আগষ্টঃ আন্তঃৰাষ্ট্ৰীয় ক্ৰিকেটৰ পৰা সন্ন্যাস ঘোষণা দক্ষিণ আফ্ৰিকাৰ খেলুৱৈ হাছিম আমলাৰ ৷ টুইটাৰ যোগে এই কথা সদৰী কৰে ক্ৰিকেট অফ দক্ষিণ আফ্ৰিকাই ৷ অৱশ্যে ঘৰুৱা ক্ৰিকেট আৰু চুপাৰ লীগত উপলব্ধ থাকিব খেলুৱৈগৰাকী ৷ 36 বছৰীয়া খেলুৱৈগৰাকীয়ে 124 খন টেষ্টত 9282 ৰান,181 খন এদিনীয়াত 8113 ৰান, 44 খন টি-20ত 1277 ৰান কৰিবলৈ সক্ষম হৈছে ৷ আমলাৰ নামত টেষ্টত 28 টা আৰু এদিনীয়াত আছে 27 টা শতক ৷
2004 চনত ভাৰতৰ বিৰুদ্ধে টেষ্ট ক্ৰিকেটত পদাৰ্পণ কৰিছিল আমলাই ৷ তেওঁ অন্তিমখন টেষ্ট মেচত অৱতীৰ্ণ হৈছিল শ্ৰীলংকাৰ বিৰুদ্ধে ৷ আনহাতে বাংলাদেশৰ বিৰুদ্ধে 2008 চনত এদিনীয়া ক্ৰিকেটত অভিষেক ঘটিছিল খেলুৱৈগৰাকীৰ ৷ শ্ৰীলংকাৰ বিৰুদ্ধেই অন্তিমবাৰৰ বাবে এদিনীয়া মেচত অৱতীৰ্ণ হৈছিল হাছিম আমলা ৷
