ডিফু, 7 ছেপ্তেম্বৰ : সদৌ অসম বেডমিণ্টন সন্থাৰ উদ্যোগত আৰু কাৰ্বি আংলং ক্ৰীড়া সন্থাৰ সহযোগত ডিফুৰ নৱনিৰ্মিত কাছা ইনড'ৰ ষ্টেডিয়ামত 2 ছেপ্তেম্বৰৰ পৰা আয়োজন কৰা হৈছিল 67 সংখ্যক ছানৰাইজ সদৌ অসম আন্ত:জিলা বেডমিণ্টন চেম্পিয়নশ্বিপ ৷ 5 দিনীয়া কাৰ্যসূচীৰে আৰম্ভ কৰা এই টুৰ্ণামেন্টৰ শুকুৰবাৰে সফল সামৰণি পৰে ৷ শুকুৰবাৰে বিভিন্ন ইভেণ্টৰ চূড়ান্ত খেল সমূহত 15 বছৰ অনুৰ্ধৰ ল'ৰাৰ ছিংগলচত গুৱাহাটীৰ অনুৰাগ তালুকদাৰে লক্ষীমপুৰৰ ইয়াছদ্বীপ গগৈক 18-21, 21-19, 21-12 ছেটত আৰু মহিলা ছিংগলচত গুৱাহাটীৰ চুজেন বুঢ়াগোঁহাইয়ে শিৱসাগৰৰ প্ৰিঞ্চি দাসক 21-14, 18-21, 21-19 ছেটত পৰাস্ত কৰে ৷ 13 বছৰ অনুৰ্ধৰ ল'ৰাৰ ছিংগলচত ডিব্ৰুগড়ৰ ৰোহিত গগৈয়ে ডিগবৈৰ উদয়ণ শইকীয়াক 15-8, 15-8 ছেটত পৰাস্ত কৰে ৷ 19 বছৰ অনুৰ্ধ ল'ৰাৰ ছিংগলচত গুৱাহাটীৰ জিমন কছাৰী আঘাতপ্ৰাপ্ত হোৱাৰ বাবে গুৱাহাটীৰে আয়ান ৰাশিদে 21-13, 11-5 ছেটত জয় লাভ কৰে ৷ 17 বছৰ অনুৰ্ধ ল'ৰাৰ ছিংগলচত শিৱসাগৰৰ নব্যৰঞ্জন দাসে শিৱসাগৰৰে হিমানিশ শেখৰ দাসক 19-21, 23-21, 21-15 ছেটত পৰাস্ত কৰে ৷ 13 বছৰ অনুৰ্ধ ল'ৰাৰ ডাবলছত শিৱসাগৰৰ বৰ্নাম বৰা আৰু শুভংকৰ দত্তই ডিব্ৰুগড়ৰ ডিব্ৰুগড়ৰ আয়ান গগৈ আৰু কৌস্তভ বৰাক 15-11, 11-15, 15-8 ছেটত, 15 বছৰ অনুৰ্ধ ল'ৰাৰ ডাবলছত গুৱাহাটীৰ অনুৰাগ তালুকদাৰ আৰু ডিব্ৰুগড়ৰ আৰ্শিষমান ৰাজখোৱাই গুৱাহাটীৰ এছষ্ট্ৰেলি সিং আৰু আৰু লক্ষীমপুৰৰ ইয়াছদীপ গগৈক 21-15, 15-21, 21-11 ছেটত আৰু 19 বছৰ অনুৰ্ধ ল'ৰাৰ ডাবলছত লক্ষীমপুৰৰ অংশুমান গগৈ আৰু শিলচৰৰ সুৰজ গোৱালাই ডিব্ৰুগড়ৰ দিক্ষিত গগৈ আৰু গোলাঘাটৰ শুভাকৰ বৰবৰুৱাক 21-15, 18-21, 21-15 ছেটত পৰাস্ত কৰে ৷
আনহাতে, মিক্সড ডাৱলছ শাখাত চৰাইদেউ আৰু গোলাঘাটৰ সঙ্গম চুতীয়া আৰু মনালী বৰাৰ যুটীয়ে ডিব্ৰুগড়ৰ হিৰকজ্যোতি নেওগ আৰু ঈশাৰাণী বৰুৱাৰ যুটীক 20-22, 21-12, 21-17 ছেটত পৰাস্ত কৰি চেম্পিয়নৰ খিতাপ দখল কৰিবলৈ সক্ষম হয় ৷ শুকুৰবাৰে অনুষ্ঠিত মেচৰ ৰেফাৰীৰ দায়িত্বত থাকে বিনীত গগৈ আৰু মেচ নিয়ন্ত্ৰক হিচাপে থাকে গুৱাহাটীৰ জয়ন্ত ঠাকুৰীয়া ৷ ইয়াৰ পাছতে আয়োজন কৰা বৰ্ণাঢ্য বঁটা বিতৰণী অনুষ্ঠানত পাৰ্বত্য উন্নয়ণ মন্ত্ৰী ছুম ৰংহাং, সাংসদ হৰেণছিং বে', কাৰ্বি আংলং স্বায়ত্ত শাসিত পৰিষদৰ মুখ্য কাৰ্যবাহী সদস্য তুলিৰাম ৰংহাং, বিজয়ী এছ'চিয়েট টুৰ্ণামেণ্ট কমিটিৰ উপসভাপতি পৰাণ হাজৰিকা, অসম বেডমিণ্টন সন্থাৰ যুটীয়া সম্পাদক গৌতম মহন্ত, নৰুল আখতাৰ, কাৰ্যবাহী সদস্য ৰিতুৰাজ চেতিয়া উপস্থিত থাকে ৷ এইসকল বিশিষ্ট লোকে বিজয়ী তথা বিজেতা দল আৰু খেলুৱৈ সকলক ট্ৰফী আৰু মানপত্ৰ বিতৰণ কৰে ৷
