গুৱাহাটী,3 জানুৱাৰীঃ ৰাজ্যত অব্যাহত আছে নাগৰিকত্ব সংশোধনী আইন বিৰোধী প্ৰতিবাদ ৷ 5 জানুৱাৰীত নাগৰিকত্ব সংশোধনী আইনৰ বিৰুদ্ধে হ'ব এক ব্যতিক্ৰমী বৃহৎ গণ প্ৰতিবাদ । এইবাৰ চৰকাৰী বিৰোধী শ্ল'গানেৰে নহয় ঢোলৰ গুমগুমনিত গুঞ্জৰিত হ'ব মহানগৰীৰ ৰাজপথ । ভূপেন হাজৰিকা সমাধিক্ষেত্ৰৰ পৰা দীঘলীপুখুৰী পাৰলৈকে 100 জন ঢুলীয়াৰ ঢোলৰ মাতত কঁপিব মহানগৰীৰ আকাশ-বতাহ । জুবিন গাৰ্গৰ আহ্বানত 5 জানুৱাৰীত ভূপেন হাজৰিকা সমাধিক্ষেত্ৰৰ পৰা হ'ব এই ব্যতিক্ৰমী প্ৰতিবাদ ।
কেৱল বাদ্যযন্ত্ৰৰে হ'ব লগা এই গণতান্ত্ৰিক প্ৰতিবাদৰ বাবে ৰাইজক ওলাই আহিবলৈ আহ্বান জুবিন গাৰ্গৰ । মহানগৰীৰ কটন বিশ্ববিদ্যালয়, বি বৰুৱা কলেজৰ পৰা আৰম্ভ কৰি প্ৰায় সংখ্যক কলেজৰ ছাত্ৰ-ছাত্ৰীয়ে অংশ গ্ৰহণ কৰিব এই প্ৰতিবাদত । কেৱল সাধাৰণ জনতা অথবা ছাত্ৰ সমাজ নহয় সদৌ অসম ছাত্ৰ সন্থাকে ধৰি বিভিন্ন দল সংগঠন, শিল্পী সমাজ, বৌদ্ধিক সমাজ সকলোৱে এই বাদ্যযন্ত্ৰ লৈ কৰিব লগা প্ৰতিবাদত মিলিত হ'ব জুবিন গাৰ্গৰ আহ্বানত।
