চিটাৰা ডেস্ক, 7 নৱেম্বৰ : এগৰাকী জনপ্ৰিয় অভিনেত্ৰী, যাক নিচিনা মানুহ হয়তো কমেই ওলাব ৷ নাম তেওঁৰ অনুস্কা চেট্টী ৷ অভিনেত্ৰীগৰাকী মূলতঃ দক্ষিণ ভাৰতৰ চলচিত্ৰ জগতৰ তেনেই চিনাকী নাম যদিও পৰিচিত সমগ্ৰ দেশবাসীৰ মাজত ৷ অনুস্কাই বাহুবলীত দেৱসেনাৰ ভূমিকাত কৰা অভিনয়ে সকলোৰে মনত গভীৰ সাঁচ বহুৱাইছিল ৷
প্ৰকৃততে অনুস্কাৰ নাম চুইটী চেট্টীহে ৷ 1981 চনৰ 7 নৱেম্বৰত অনুস্কাৰ জন্ম হৈছিল ৷ তামিল আৰু তেলেগু ছবিজগতত কাম কৰাৰ উপৰিও অনুস্কা এগৰাকী প্ৰখ্যাত মডেল হিচাপে পৰিচিত ৷ তেওঁ ইতিমধ্যে কেইবাটাও বঁটা লাভ কৰিছে, যাৰ ভিতৰত আছে তিনিটাকৈ চলচিত্ৰ বঁটা, এটা নন্দী বঁটা, টিএন ষ্টেট ফিল্ম এৱাৰ্ড আৰু আঠটা শিতানৰ মনোনয়নৰ পৰা তিনিটাকৈ ফিল্মফেয়াৰ বঁটা ৷
প্ৰায় ৫০ খনতকৈও অধিক চলচ্চিত্ৰত অভিনয় কৰা অনুষ্কা ভাৰতৰ সৰ্বাধিক উপাৰ্জন কৰা অভিনেত্ৰীসকলৰ ভিতৰত অন্যতম ৷ তদুপৰি জনপ্ৰিয়তাৰ দিশৰ পৰা চাবলৈ গ’লে অনুস্কাক দক্ষিণ ভাৰতীয় চলচ্চিত্ৰৰ লেডী চুপাৰষ্টাৰ বুলি কোৱা হয় ৷
অভিনেত্ৰীগৰাকীয়ে ২০০৫ চনত তেলেগু চলচ্চিত্ৰ ‘চুপাৰ’ৰ জৰিয়তে অভিনয় জগতত আত্মপ্ৰকাশ ঘটাইছিল ৷ নৱাগতা অভিনেত্ৰীগৰাকীয়ে এই ছবিৰ বাবে ফিল্মফেয়াৰত শ্ৰেষ্ঠ সহ-অভিনেত্ৰী(তেলেগু)ৰ মনোনয়ন লাভ কৰিছিল ৷ পৰৱৰ্তী বছৰত তেওঁ এছ এছ ৰাজামৌলীৰ বিক্ৰমাৰকুডুত অভিনয় কৰে, যি বক্স অফিচত হিট হৈছিল ৷
