নিউজ ডেস্ক, 30 জুন : বলিউদৰ আগন্তুক বোলছবি '83' ৰ প্ৰযোজক মধু মান্টেনাই পুনৰ ক্ৰিকেটক বিষয়বস্তু হিচাপে লৈ ছবি নিৰ্মাণৰ আশা প্ৰকাশ কৰিছে ৷ টীম ইণ্ডিয়াই বিশ্বকাপ ক্ৰিকেট, 2019 ৰ খিতাপ দখল কৰিলে নিশ্চিতভাৱে বোলছবি নিৰ্মাণ কৰিব বুলি মন্তব্য কৰে প্ৰযোজক গৰাকীয়ে ৷
কবিৰ খানৰ নিৰ্দেশনাত নিৰ্মিত '83' বোলছবিৰ মুখ্য বিষয়বস্তু হৈছে 1983 চনৰ টীম ইণ্ডিয়াৰ ঐতিহাসিক বিশ্বকাপ জয় ৷ ফাইনেলত দলটোৱে ৱেষ্ট ইণ্ডিজক পৰাস্ত কৰি বিশ্বকাপৰ খিতাপ প্ৰথমবাৰৰ বাবে হাতত তুলি লৈছিল ৷
উল্লেখ্য যে, ৰণবীৰ সিঙে মুখ্য চৰিত্ৰত অভিনয় কৰিবলগা '83' মুক্তিলাভ কৰিব অহা বছৰৰ 10 এপ্ৰিলত ৷ ৰণবীৰৰ উপৰি বহুকেইটা বিশেষ চৰিত্ৰত অভিনয় কৰিব ছাকিব ছলিম, জিবা, এম্মী, হাৰ্ডি সন্ধু আৰু পংকজ ত্ৰিপাঠীয়ে ৷ এই ছবিখন মধু মান্টেনাৰ সৈতে যুটীয়া ভাৱে প্ৰযোজনা কৰিব ছাজিদ নাদিয়াদৱালা আৰু ৰিলায়েঞ্চ এন্টাৰটেইন্টমেন্টে ৷
উল্লেখ্য যে, ইংলেণ্ডত অনুষ্ঠিত বিশ্বকাপ ক্ৰিকেটত ভাৰতীয় দলে দুৰ্দান্ত প্ৰদৰ্শনেৰে ছেমি ফাইনেলত প্ৰৱেশৰ আশা সজীৱ কৰি ৰাখিছে ৷
