চিটাৰা ডেস্ক,8 আগষ্টঃ জনপ্ৰিয় অভিনেতা সুশান্ত সিং ৰাজপুতৰ পিতৃ কে.কে সিঙক সাক্ষাৎ কৰে হাৰিয়ানাৰ মুখ্যমন্ত্ৰী মনোহৰ লাল খট্টৰে ৷ দুয়োৰে সাক্ষাৎ হয় ফৰিদাবাদৰ পুলিচ কমিচনাৰ অ'পি সিঙৰ গৃহত ৷
এইখিনিতে জনাই থওঁ যে, পুলিচ কমিচনাৰ অ'পি সিং সুশান্ত সিং ৰাজপুতৰ ভিনিয়েক হয় ৷ প্ৰায় 10 মিনিট সময় কথা-বতৰা চলে সুশান্ত সিং ৰাজপুতৰ পিতৃ কে.কে সিং আৰু হাৰিয়ানাৰ মুখ্যমন্ত্ৰী মনোহৰ লাল খট্টৰৰ মাজত ৷
উল্লেখনীয় যে, 3 আগষ্টত সুশান্তৰ পিতৃ আহিছিল ফৰিদাবাদলৈ ৷ সেইদিনাই তেওঁ সুশান্ত সিং ৰাজপুতৰ মৃত্যু সন্দৰ্ভত গুৰুত্বপূৰ্ণ মন্তব্য কৰিছিল ৷ তেওঁ কৈছিল, 25 ফেব্ৰুৱাৰীত তেওঁ পুত্ৰৰ জীৱনৰ ওপৰত কিবা বিপদ আহিব পাৰে বুলি মুম্বাইৰ বান্দ্ৰা পুলিচক আগজাননী দি থৈছিল ৷ কিন্তু মুম্বাই পুলিচে এই সন্দৰ্ভত কোনো তদন্তই নকৰিলে বুলি তেওঁ গুৰুতৰ অভিযোগ উত্থাপন কৰে ৷
সুশান্তৰ মৃত্যুৰ 40 দিন বাগৰাৰ পিছতো মহাৰাষ্ট্ৰৰ আৰক্ষীৰ বিশেষ তৎপৰতা নেদেখি পিতৃয়ে বিহাৰ আৰক্ষীৰ ওচৰত গোচৰ দাখিল কৰে ৷ সম্প্ৰতি সমগ্ৰ ঘটনা সন্দৰ্ভত তদন্ত আৰম্ভ কৰিছে C.B.I দলে ৷
