কাছাৰ,29আগষ্টঃ যোৱা ৬ আগষ্টৰ নিশা কাছাৰ জিলাৰ নতুন বজাৰত কাছাৰ বন বিভাগে মিজোৰামৰ পৰা অহা As01Fc 8256, NL01Ac 0685 আৰু NL01Ad 5612 নম্বৰৰ তিনিখন অবৈধ চেগুন কাঠ ভৰ্তি ট্ৰাক জব্দ কৰিছিল ৷ এই জব্দকৃত তিনিখন গাড়ীৰ পৰা ২০ লাখ টকাৰ প্ৰায় চাৰি হাজাৰ CFT কাঠ জব্দ কৰিছিল বনবিভাগে ৷ উল্লেখ্য যে গুৱাহাটীৰ বিজয় আগৰৱালা নামৰ এজন লোকৰ কাঠসমূহ কঢ়িয়াই অনা ট্ৰাককেইখন মিজোৰামৰ পৰা গুৱাহাটী যোৱাৰ কথা আছিল ৷ কিন্তু ৰহস্যজনক ভাবে ১২ লাখ টকাৰ বিনিময়ত এই তিনিখন ট্ৰাক এৰি দিয়াৰ এক অভিযোগ উঠিছে ডিএফঅ' সানি দেও চৌধুৰীৰ বিৰুদ্ধে ৷ এই অভিযোগ উত্থাপন কৰিছে বিজয় আগৰৱালাৰ এজন ঘনিষ্ঠই ৷ তেওঁৰ অভিযোগ অনুসৰি তিনিখন ট্ৰাক এৰি দিয়াৰ বাবদ ডিএফঅ' চৌধুৰীয়ে ১৫ লাখ টকা দাবী কৰে ৷ কিন্তু তেওঁ বিজয় আগৰৱালাৰ নিৰ্দেশত 12 লাখ টকাতে তিনিওখন ট্ৰাক এৰি দিয়াৰ বাবে ডিএফঅ' চৌধুৰীক মান্তি কৰায় ৷ ইপিনে এই টকা দিয়াৰ পাচতো ডিএফঅ' চৌধুৰীয়ে এই পৰ্যন্ত জব্দকৃত গাড়ীকেইখন এৰি নিদিয়াৰ অভিযোগ তুলিছে লোকজনে ৷
আনহাতে এই সমস্ত অভিযোগ অস্বীকাৰ কৰি কাছাৰৰ ডিএফঅ' সানি দেও চৌধুৰীয়ে কয় এই সমস্ত অভিযোগ মিছা আৰু ভিত্তিহীন ৷ বহুবাৰ এনে অবৈধ কাঠ তেওঁ জব্দ কৰাৰ পিচত বহুতে তেওঁৰ বিৰুদ্ধে এনে মিছা অভিযোগ তুলিছে ৷ পিচে কোন সঁচা, কোন মিছা এই সমস্ত কথা পোহৰলৈ আহিব তদন্তৰ পাচতহে ৷
