ইণ্টাৰনেচনেল ডেস্ক, ১৩ ছেপ্টেম্বৰ : মঙলবাৰে ৰাছিয়াৰ বন্দৰ চহৰ ভ্লাদিভষ্টকত প্ৰধানমন্ত্ৰী নৰেন্দ্ৰ মোদীৰ নীতিৰ প্ৰশংসা কৰি ৰাছিয়াৰ ৰাষ্ট্ৰপতি ভ্লাদিমিৰ পুটিনে কয় যে প্ৰধানমন্ত্ৰী মোদীয়ে মে'ক ইন ইণ্ডিয়া কাৰ্যসূচীৰ প্ৰচাৰৰ ক্ষেত্ৰত সঠিক কাম কৰি আছে । ৰাছিয়াত নিৰ্মিত গাড়ী সন্দৰ্ভত সংবাদ মাধ্যমৰ প্ৰশ্নৰ উত্তৰত তেওঁ অষ্টম ইষ্টাৰ্ণ ইকন'মিক ফ'ৰামত (ইইএফ) ভাষণ দি এই মন্তব্য কৰে ।
পুটিনে কয় যে ঘৰুৱাভাৱে নিৰ্মিত অটোমোবাইল ব্যৱহাৰ কৰিবই লাগিব আৰু ভাৰতে ইতিমধ্যে প্ৰধানমন্ত্ৰী মোদীৰ নেতৃত্বত ইয়াৰ নীতিৰ জৰিয়তে উদাহৰণ স্থাপন কৰিছে । মঞ্চত এক ভাষণত পুটিনে কয়, "আপোনালোকে জানে যে সেই সময়ত আমাৰ ওচৰত ঘৰুৱাভাৱে নিৰ্মিত গাড়ী নাছিল, কিন্তু আমি এতিয়া সেয়া কৰিছোঁ । এইটো সঁচা যে, সেইবোৰ মাৰ্চিডিজ বা অডি গাড়ীতকৈ দেখাত তেনেই সাধাৰণ আছিল, যিবোৰ আমি ১৯৯০-ৰ দশকত বৃহৎ পৰিমাণত ক্ৰয় কৰিছিলোঁ । কিন্তু সেইটো এটা বিষয় নহয় । মই ভাবোঁ যে, আমি আমাৰ বহুতো অংশীদাৰক অনুকৰণ কৰা উচিত । উদাহৰণ স্বৰূপে ভাৰত । তেওঁলোকে ভাৰতীয় নিৰ্মিত বাহন নিৰ্মাণ আৰু ব্যৱহাৰৰ ওপৰত গুৰুত্ব আৰোপ কৰিছে । মই ভাবোঁ যে, প্ৰধানমন্ত্ৰী মোদীয়ে মে'ক ইন ইণ্ডিয়া কাৰ্যসূচীৰ প্ৰচাৰত সঠিক কাম কৰি আছে । তেওঁ ঠিকেই কৰিছে ।"
তেওঁ লগতে কয় যে, ৰাছিয়াত নিৰ্মিত অটোমোবাইল ব্যৱহাৰ কৰাটো সম্পূৰ্ণৰূপে ভাল । "আমাৰ ওচৰত (ৰাছিয়াত নিৰ্মিত) অটোমোবাইল আছে আৰু আমি সেইবোৰ ব্যৱহাৰ কৰিবই লাগিব; এইটো একেবাৰে সঠিক । ইয়াৰ ফলত আমাৰ ডব্লিউটিঅ'ৰ দায়বদ্ধতাৰ কোনো উলংঘন নহ'ব । ই ৰাষ্ট্ৰীয় ক্ৰয়ৰ বিষয় । বিভিন্ন শ্ৰেণীৰ বিষয়াসকলে কি গাড়ী চলাব পাৰে সেই সন্দৰ্ভত আমি এক নিৰ্দিষ্ট শৃংখলা সৃষ্টি কৰিব লাগিব, যাতে তেওঁলোকে ঘৰুৱাভাৱে নিৰ্মিত গাড়ী ব্যৱহাৰ কৰে ।" পুটিনে ভ্লাদিভষ্টকত দিয়া ভাষণৰ ক্ৰেমলিনৰ ৱেবছাইটত পোষ্ট কৰা পূৰ্ণাংগ অধিবেশনৰ প্ৰতিলিপিত এই কথা প্ৰকাশ কৰিছে ।
আমেৰিকা যুক্তৰাষ্ট্ৰই ইউৰোপীয় ইউনিয়ন, চৌদি আৰব আৰু ভাৰতৰ সৈতে এক নতুন অৰ্থনৈতিক কৰিডৰ সৃষ্টিৰ ক্ষেত্ৰত সন্মত হৈছে । কিন্তু প্ৰকল্পটো ৰাছিয়াৰ হিতৰ বাবে হ'ব । ইষ্টাৰ্ণ ইকন'মিক ফ'ৰামত দিয়া পুটিনৰ ভাষণৰ উদ্ধৃতি দি ৰাছিয়াৰ সংবাদ সংস্থা টাছে প্ৰকাশ কৰিছে । আনহাতে, ৰাছিয়াৰ ৰাষ্ট্ৰপতিয়ে কয় যে, আইএমইচিয়ে দেশখনক লজিষ্টিক বিকাশত সহায় কৰিব আৰু লগতে কয় যে, প্ৰকল্পটো কেইবা বছৰ ধৰি আলোচনাৰ মেজত আছে ।
উল্লেখ্য যে, নতুন দিল্লীত জি-২০ সন্মিলনৰ সময়ত শনিবাৰে ভাৰত, আমেৰিকা যুক্তৰাষ্ট্ৰ, ইউএই, চৌদি আৰব, ফ্ৰান্স, জাৰ্মানী, ইটালী আৰু ইউৰোপীয় ইউনিয়নে ভাৰত-মধ্যপ্ৰাচ্য-ইউৰোপ অৰ্থনৈতিক কৰিডৰ স্থাপনৰ বাবে বুজাবুজিৰ চুক্তি স্বাক্ষৰ কৰাৰ পিছত তেওঁৰ এই মন্তব্য আহিছে ।
লগতে পঢ়ক :American Agri Products: কেইবাটাও আমেৰিকান কৃষিজাত সামগ্ৰীৰ শুল্ক হ্ৰাস; ভাৰতৰ সন্মতিক আমেৰিকাৰ আদৰণি
