চিৰিয়াত পুনৰ ইজৰাইলৰ মিছাইল আক্ৰমণ

চিৰিয়াত এতিয়া যুদ্ধ সদৃশ পৰিৱেশ । শেহতীয়াভাৱে ইজৰাইলে চিৰিয়াৰ ওপৰত বিভিন্ন ধৰণে আক্ৰমণ অব্যাহত ৰাখিছে । যোৱা দুটা দিনত চিৰিয়াত দুবাৰকৈ মিছাইল আক্ৰমণ কৰিছে ইজৰাইলে ।

ইণ্টাৰনেশ্যনেল ডেস্ক, ২০ আগষ্ট : ইফালে আফগানিস্তানত তালিবানৰ (Taliban) নিয়ন্ত্ৰণ আৰু আনফালে চিৰিয়াত অব্যাহত আছে ইজৰাইলৰ আক্ৰমণ । চিৰিয়াৰ চৰকাৰী সংবাদমাধ্যমৰ মতে বৃহস্পতিবাৰে নিশা পুনৰ ইজৰাইলে চিৰিয়াত মিছাইল আক্ৰমণ (missile strikes) কৰে । চিৰিয়াৰ ৰাজধানী দামাস্কাছ আৰু হোমছচ কেন্দ্ৰীয় প্ৰদেশৰ কিছুমান স্থানত ইজৰাইলে মিছাইল নিক্ষেপ কৰে ।

চিৰিয়াৰ বায়ু সেনাই এই আক্ৰমণৰ প্ৰতি সঁহাৰি জনাই আৰু কেইবাটাও ইজৰাইলী মিছাইল ধ্বংস কৰিবলৈ সক্ষম হয় । মিছাইল আক্ৰমণৰ ফলত ক্ষয়ক্ষতিৰ তথ্য এতিয়াও পোহৰলৈ অহা নাই যদিও জানিব পৰা মতে চিৰিয়াই ইয়াৰ মূল্যাংকণ কৰি আছে । ইফালে চিৰিয়াৰ বায়ু প্ৰতিৰক্ষা বাহিনীয়ে (Syrian air defense) আক্ৰমণ প্ৰতিহত কৰাৰ বাবে চেষ্টা অব্যাহত ৰখাৰ মাজতে দামাস্কাছত বিস্ফোৰণৰ শব্দ স্পষ্টভাৱে শুনা গৈছিল বুলিও সূত্ৰৰ পৰা জানিব পৰা গৈছে ।