ইণ্টাৰনেশ্যনেল ডেস্ক, ২ আগষ্ট: যোৱা ১ ফেব্ৰুৱাৰীত সামৰিক অভ্যুত্থানৰ পাছতে ম্যানমাৰ(Myanmar)ৰ ৰাজনৈতিক, অৰ্থনৈতিক, সামাজিক সকলো ক্ষেত্ৰৰে দৃশ্যপট সলনি হৈছে । আং চান চ্যু কীৰ চৰকাৰক ক্ষমতাচ্যুত কৰি ৬ মাহ ধৰি সামৰিক বাহিনীয়ে শাসন কৰিছে ম্যানমাৰত । এইবাৰ নিজেই প্ৰধানমন্ত্ৰীৰ আসন অলংকৃত কৰিবলৈ আগবাঢ়িছে ম্যানমাৰ(Myanmar)ৰ সামৰিক নেতা মিন আং হ্লাইঙে(Min Aung Hlaing) । দ্য হিলৰে প্ৰকাশ কৰা বাতৰি অনুসৰি, দেওবাৰে তেওঁ নিজকে নিজে 'প্ৰধানমন্ত্ৰী' বুলি ঘোষণা কৰিছে ।
দেশখনত বলৱৎ হৈ থকা জৰুৰীকালীন অৱস্থাৰ সময়সীমা সম্প্ৰসাৰিত হোৱাৰ পৰিপ্ৰেক্ষিতত দুবছৰৰ বাবে মিন আং হ্লাইঙে প্ৰধানমন্ত্ৰীৰ দায়িত্ব পালন কৰাৰ পৰিকল্পনা কৰিছে । ২ বছৰৰ ভিতৰতে ম্যানমাৰত পুনৰ নিৰ্বাচন অনুষ্ঠিত হ'ব বুলিও তেওঁ জানিবলৈ দিছে । তেওঁ ভাষণ প্ৰসংগত দেশৰ ৰাজনৈতিক সমস্যাৰ সমাধান বিচাৰি দক্ষিণ-পূব এছিয়াৰ দেশসমূহৰ সৈতে সহযোগিতা কৰাৰ প্ৰতিশ্ৰুতি পুনৰাবৃত্তি কৰে । তেওঁ কয় যে, দেশত মুক্ত আৰু নিৰপেক্ষ বহুদলীয় সাধাৰণ নিৰ্বাচন অনুষ্ঠিত কৰাৰ বাবে সুস্থিৰ পৰিস্থিতি সৃষ্টি কৰিব লাগিব ।
ইয়াৰ বাবে প্ৰস্তুতি চলাব লাগিব বুলিও তেওঁ মন্তব্য কৰে । বহুদলীয় সাধাৰণ নিৰ্বাচন সফলভাৱে সুচাৰুৰূপে অনুষ্ঠিত কৰিব বুলিও তেওঁ প্ৰতিশ্ৰুতি দিয়ে । হ্লাইঙে কয় যে, সামৰিক কৰ্তৃপক্ষই ২০২৩ চনৰ আগষ্ট মাহৰ ভিতৰত জৰুৰীকালীন অৱস্থাৰ সকলো ব্যৱস্থা সম্পূৰ্ণ কৰিব ।
যোৱা ১ ফেব্ৰুৱাৰীত নিৰ্বাচিত হৈ শাসনলৈ অহা আং চান চ্যু কী চৰকাৰক ক্ষমতাচ্যুত কৰিছিল সামৰিক বাহিনীয়ে আৰু জৰুৰীকালীন অৱস্থা ঘোষণা কৰা হৈছিল । সামৰিক বাহিনীয়ে অভিযোগ উত্থাপন কৰিছিল যে, শেহতীয়া নিৰ্বাচনত আং চান চ্যু কীয়ে ভোটাৰক প্ৰৱঞ্চনা কৰি বিজয়ী হৈছিল । কিন্তু সামৰিক বাহিনীৰ ওচৰত এই সন্দৰ্ভত কোনো বিশ্বাসযোগ্য প্ৰমাণ নাই । তেতিয়াৰে পৰা আং চান চ্যু কীৰ বিৰুদ্ধে একাধিক অপৰাধৰ অভিযোগ আৰোপ কৰা হৈছে ।
