এইবাৰ আফগানিস্তানত সলনি হ’ব নেকি তালিবানৰ পুৰুষতান্ত্ৰিক চৰিত্ৰ?

আফগানত তালিবানৰ শাসনে দেশখনৰ নাগৰিকসকলক বিশেষকৈ মহিলাসকলক পুনৰ অন্ধকাৰ ভৱিষ্যতৰ দিশে ঠেলি দিব নেকি? সমগ্ৰ বিশ্বৰে শংকাৰ বিপৰীতে তালিবানে কিন্তু এইবাৰ আফগানিস্তানৰ চৰকাৰত মহিলাৰ অংশগ্ৰহণৰ বাবে আহ্বান জনাইছে ৷ এয়া তালিবানৰ নিজৰ বিষয়ে থকা বিদ্বেষমূলক ছবিখন সলনি কৰাৰ প্ৰয়াস নেকি?

ইন্টাৰনেশ্যনেল ডেস্ক, 17 আগষ্ট : আফগানিস্তানৰ গাদীত তালিবান অধিষ্ঠিত হোৱাৰ পিছতে দেশখনত মহিলাসকলৰ স্বাধীনতাক লৈ পুনৰবাৰ প্ৰশ্ন উত্থাপন হৈছে ৷ তালিবানী যোদ্ধাসকলৰ বৰ্বৰতা তথা মহিলাক দমন নীতিয়ে সমগ্ৰ বিশ্বতে সংবাদৰ শিৰোনাম দখল কৰিছে ৷ কিন্তু এইসমূহ আশংকাৰ মাজতো এক বিপৰীত ছবিহে ভাহি আহিছে সংগঠনটোৰ তৰফৰ পৰা ৷ এনে লাগিছে যেন মৌলবাদী এই সংগঠনটোৱে নিজৰ পূৰ্বৰ ছবিখন নোহাৱা কৰিবৰ বাবে আৰু ৰাইজৰ মাজত এই ভয় দূৰ কৰিবলৈ প্ৰয়াস কৰিছে ৷

তালিবানে কাবুল দখল কৰাৰ পিছতেই এগৰাকী মহিলা বাতৰি পৰিৱেশকে স্থানীয় এটি সংবাদ মাধ্যমত সংগঠনটোৰ এগৰাকী নেতাৰ সাক্ষাৎকাৰ লৈছিল ৷ এই ছবিখন টুইটাৰযোগে শ্বেয়াৰ কৰি সেই সংবাদ গোষ্ঠীটোৰ মুখ্য সম্পাদক মিৰাক পোপালে লিখিছিল, "Our female presenter is interviewing a Taliban media team member live in our studio @TOLOnews #Afghanistan" অৰ্থাৎ ‘আমাৰ এগৰাকী মহিলা বাতৰি পৰিৱেশকে তালিবানী সাংবাদ দলৰ এগৰাকী সদস্যৰ সাক্ষাৎকাৰ গ্ৰহণ কৰিছে ৷’

TOLOnewsৰ টুইট

সমান্তৰালকৈ, তালিবানী সাংস্কৃতিক সংগঠনৰ সদস্য ইনামুল্লা চমনগানীয়ে মঙলবাৰে আফগান ৰাজ্যিক টেলিভিছনত মহিলাসকলক চৰকাৰত অংশগ্ৰহণ কৰিবলৈ আহ্বান জনাইছে ৷

ইনামুল্লা চমনগানীয়ে লগতে কয়, "ইছলামিক এমিৰাটে মহিলাক ভুক্তভোগী হোৱাটো নিবিচাৰে " ৷ যেতিয়া 1996 চনৰ পৰা 2001লৈ প্ৰথবাৰৰ বাবে আফগানিস্তানত তালিবান শাসনলৈ আহিছিল তেওঁলোকে নিজৰ বিদ্বেষমূলক আচৰণ আৰু মহিলাৰ ওপৰত কৰা অত্যাচাৰৰ বাবে আন্তৰ্জিকভাৱে কুখ্যাত হৈ পৰিছিল ৷

লগতে পঢ়ক : আফগানিস্তানত তালিবানৰ দপদপনি

আফগানিস্তানত সামাজিক স্থানত মহিলাসকলক সকলো সময়তে বোৰ্খা পৰিধান কৰিবলৈ বাধ্য কৰোৱা হৈছিল ৷ এগৰাকী তালিবানী মুখপাত্ৰৰ মতে, এগৰাকী মহিলাৰ সৈতে সম্পৰ্ক নথকা আন পুৰুষৰ বাবে "মহিলাৰ চেহেৰাই সকলোধৰণৰ দুৰ্নীতিৰ উৎস" ৷ এক প্ৰণালীবদ্ধ পৃথকীকৰণ যাক কেতিয়াবা লিংগ বৈষম্য বুলিও কোৱা হয় তাৰ ফলত মহিলাসকলক কাম কৰিবলৈ অনুমতি দিয়া হোৱা নাছিল ৷ 8 বছৰৰ পিছত তেওঁলোকৰ নাছিল শিক্ষাগ্ৰহণৰ অনুমতি ৷ 8 বছৰ বয়সলৈ তেওঁলোকক কেৱল কোৰাণৰ শিক্ষাহে প্ৰদান কৰা হৈছিল ৷

মহিলাসকলক চাইকেল বা মটৰ চাইকেলত বহাৰ ক্ষেত্ৰত আছিল নিষেধাজ্ঞা ৷ তেওঁলোকে মহৰম বা পৰিয়ালৰ আন সদস্যসকলৰ সৈতেও মটৰচাইকেলত বহিব নোৱাৰিছিল ৷ আনকি টেক্সিটো তেওঁলোকে মহৰম অবিহনে অকলে ফুৰাৰ ক্ষেত্ৰত আছিল সম্পূৰ্ণ নিষেধাজ্ঞা ৷ বাছসমূহত পুৰুষ-মহিলাক একেলগে উঠিবলৈ অনুমতি দিয়া হোৱা নাছিল ৷ ইয়াৰ বাবে পৃথক পৃথক বাছ সেৱা মুকলি কৰা হৈছিল ৷

তালিবানী নেতাক সাক্ষাৎকাৰ লোৱা অৱস্থাত মহিলা বাতৰি পৰিৱেশক

হাস্পতালসমূহত পুৰুষ চিকিৎসকে চিকিৎসা প্ৰদান কৰিব নোৱাৰিছিল মহিলাক ৷ ইয়াৰ বাবে মহিলাসকলে চিকিৎসা সেৱাৰ বাবে বহু দূৰলৈ যাবলগীয়া হৈছিল ৷

এতিয়া তালিবান পুনৰবাৰ আফগানিস্তানৰ শাসনলৈ অহাৰ পিছত ইয়াৰ নাগৰিকসকলৰ মাজত পুনৰ ভয় আৰু শংকাই দেখা দিছে ৷ শংকিত আফগান নাগৰিকসকলে দেশ এৰি যাবলৈ হাহাকাৰ কৰিছে ৷

ইনামুল্লা চমনগানীৰ ভাষ্য আৰু তালিবানী নেতাৰ সাক্ষাৎকাৰে মহিলাসকৰ শংকা কিছু দূৰ কৰিলেও আফগানসকলৰ বিশ্বাসৰ পাত্ৰ হ’বলৈ তালিবানে এতিয়াও বহু কাৰ্য কৰিবলগীয়া আছে ৷ তালিবানী সেনাৰ মহিলাক লৈ কৰা মন্তব্যই 2019 চনৰে পৰা দিল্লীতে থকা আদিবাক এতিয়াও পতিয়ন নিয়াবলৈ সক্ষম হোৱা নাই ৷

ইটিভি ভাৰতৰে হোৱা সাক্ষাৎকাৰত আদিবাই কয়, "তালিবানীসকল যথেষ্ট চতুৰ ৷ তেওঁলোকে কিছু দেশৰ চৰকাৰ আৰু ৰাষ্ট্ৰ সংঘৰ পৰা গ্ৰহণযোগ্যতা পাবলৈ এইসমূহ মন্তব্য কৰিছে ৷ কিন্তু সময়ৰ সৈতে লাহে লাহে তেওঁলোকে নিজৰ প্ৰকৃত স্বৰূপ উদঙাই দিব ৷"

লগতে পঢ়ক : এতিয়াৰে পৰা বায়ুসেনা সহ বিশাল সামৰিক সম্পত্তিৰ অধিকাৰী হ’ব তালিবান