নেশ্যনেল ডেস্ক, 22 ফেব্ৰুৱাৰীঃ আমেৰিকাৰ হোৱাইট হাউচত শুকুৰবাৰে ৰাষ্ট্ৰপতি ড’নাল্ড ট্ৰাম্পৰ ভাৰত আগমণক লৈ আলোচনা ৷ আগন্তুক 24 আৰু 25 ফেব্ৰুৱাৰীত মাৰ্কিন ৰাষ্ট্ৰপতিগৰাকীয়ে ফাৰ্ষ্ট লেডী মেলানিয়া ট্ৰাম্পৰ সৈতে আহমেদাবাদ, আগ্ৰা আৰু নতুন দিল্লীত আমেৰিকাৰ প্ৰতিনিধি দলৰ 12 গৰাকী সদস্যক প্ৰতিনিধিত্ব কৰিব ৷ ‘‘ট্ৰাম্পৰ ভাৰত আগমণে বিশ্বৰ দুই বৃহৎ গণতন্ত্ৰৰ মাজত শক্তিশালী আৰু স্থায়ী সম্বন্ধক প্ৰদৰ্শন কৰিব ৷’’ এই মন্তব্য প্ৰদান কৰে হোৱাইট হাউচৰ অধিকাৰীয়ে ৷
আমেৰিকাৰ এই প্ৰতিনিধি দলত বাণিজ্য বিষয়ক সম্পাদক উইল্বৰ ৰচ, শক্তি বিষয়ক সম্পাদক ডেন ব্ৰাওলেট, ভাৰপ্ৰাপ্ত চীফ অৱ ষ্টাফ মিক মুলভনে আৰু জাতীয় সুৰক্ষা উপদেষ্টা ৰবাৰ্ট ও ব্ৰিয়েনো অন্তৰ্ভুক্ত হৈ আছে ৷ ইয়াৰোপৰি ট্ৰাম্পৰ সহকাৰী আৰু জ্যেষ্ঠ উপদেষ্টা তেওঁৰ কন্যা ইৱাংকা আৰু জোঁৱাই জেৰেড কুশনৰেও ভাৰতলৈ আহিব ৷ ভাৰতে নিযুক্তি দিয়া মাৰ্কিন ৰাষ্ট্ৰদূত কেন জাষ্টাৰো আমেৰিকাৰ প্ৰতিনিধি দলৰ সৈতে ভাৰতত উপস্থিত হ’ব ৷
‘‘আমাৰ এই যাত্ৰাই কেইবাটাও মুখ্য বিষয়ক আগস্থান দিব ৷ পোনপ্ৰথমে আমি আমাৰ অৰ্থনৈতিক আৰু শক্তি উৎপাদন বিষয় সম্পৰ্কত মনোনিৱেশ কৰিম৷’’ হোৱাইট হাউচত আমেৰিকান অধিকাৰীয়ে এইদৰে মন্তব্য দাঙি ধৰে ৷ শক্তি উৎপাদনৰ ক্ষেত্ৰত ভাৰত বিশ্বৰ পঞ্চম বৃহত্তম অৰ্থনৈতিক দেশ বুলি মন্তব্য প্ৰদান কৰি আমেৰিকাৰ অধিকাৰীয়ে কয় যে, ‘‘আমি ভাৰতক এই চাহিদা পূৰণৰ ক্ষেত্ৰত সহায় কৰিবলৈ প্ৰস্তুত ৷’’
আমেৰিকাৰ এই ভাৰত ভ্ৰমণৰ দ্বাৰা দুয়োখন দেশে সন্ত্ৰাসবাদ নিৰ্মূলৰ লগতে ভাৰত-প্ৰশান্ত মহাসাগৰীয় অঞ্চলসমূহত গুৰুত্ব প্ৰদান কৰি প্ৰতিৰক্ষা আৰু সুৰক্ষাৰ দিশত মনোনিৱেশ কৰিব ৷ ‘‘আমেৰিকাই এনেকুৱা এখন ভাৰত বিচাৰে, য’ত ভাৰত-প্ৰশান্ত মহাসাগৰীয় অঞ্চলত শান্তি, স্থিতিশীলতা আৰু নিয়ম ভিত্তিক আদেশক সমৰ্থন কৰাৰ হেতু একোটা সক্ষম সামৰিক বাহিনী গঠনত আমেৰিকাই গুৰুত্ব প্ৰদান কৰিব ৷’’
লগতে পঢ়কঃ ট্ৰাম্পৰ তিনিঘন্টীয়া গুজৰাট ভ্ৰমণত ব্যয় হ’ব 85 কোটি টকা
হোৱাইট হাউচ অধিকাৰীয়ে ভাষ্য অনুসৰি, সোমবাৰে ৰাষ্ট্ৰপতি ট্ৰাম্পে আহমেদাবাদত উপস্থিত হৈ প্ৰধানমন্ত্ৰী মোদীৰ সৈতে চৰ্দাৰ পাটেল ষ্টেডিয়াম পৰিদৰ্শন কৰিব ৷ সোমবাৰে নিশা ৰাষ্ট্ৰপতি আৰু ফাৰ্ষ্ট লেডী প্ৰধানমন্ত্ৰী মোদীৰ সৈতে দিল্লীত উপস্থিত হৈ মঙলবাৰে আগ্ৰাৰ তাজমহলত সময় অতিবাহিত কৰিব আৰু দিল্লীৰ কাৰ্যসূচীত অংশ ল’ব ৷ লগতে ভাৰতৰ ৰাষ্ট্ৰপতি আৰু 3 দূতবাস কৰ্মচাৰীৰ সৈতে বৈঠকত মিলিত হ’ব৷ ইয়াৰ অন্তত মঙলবাৰে সন্ধিয়া ৰাষ্ট্ৰপতি ভৱনত ৰাষ্ট্ৰপতিৰ সৈতে নৈশ ভোজন গ্ৰহণ কৰিব মাৰ্কিন ৰাষ্ট্ৰপতি গৰাকীয়ে ৷
