কোকৰাঝাৰ,১৪ অক্টোবৰ: বিটিআৰ চুক্তিয়ে শান্তি সম্প্ৰতি আৰু উন্নয়নৰ ক্ষেত্ৰত এক সুবৰ্ণ সুযোগ প্ৰদান কৰিছে । এই চুক্তিৰ যোগেদিয়ে বিটিএডিৰ উজ্বল ভৱিষ্যত ৰচিত হ’ব । বিটিআৰ শান্তি চুক্তিক অৱজ্ঞা কৰা আৰু পাহৰি যোৱাটো কোনো কাৰণতে উচিত নহয় । এই মন্তব্য প্ৰকাশ কৰিছে ৰাজ্যৰ মুখ্যমন্ত্ৰী সৰ্বানন্দ সোণোৱালে ৷
কোকৰাঝাৰ উচ্চতৰ মাধ্যমিক আৰু বহুমুখী বিদ্যালয়ৰ খেলপথাৰ প্ৰাংগণত বিজেপিৰ অনুসূচিত জনজাতি মৰ্চাৰ কাৰ্য নিৰ্বাহক সভাৰ অন্তিম দিনৰ কাৰ্যসূচীত উপস্থিত থাকি মুখ্যমন্ত্ৰী সৰ্বানন্দ সোণোৱালে উক্ত মন্তব্য প্ৰকাশ কৰে । বিটিআৰ চুক্তিৰ ক্ষীপ্ৰ ৰূপায়ণৰ বাবে প্ৰধানমন্ত্ৰী নৰেন্দ্ৰ মোদী আৰু গৃহমন্ত্ৰী অমিত শ্বাহক কৃতজ্ঞতা জ্ঞাপন কৰি মুখ্যমন্ত্ৰী সৰ্বানন্দ সোণোৱালে বিটিআৰ চুক্তিৰ সন্দৰ্ভত অৱগত কৰিবলৈ প্ৰতিটো পৰিয়ালৰ কাষলৈ যাবলৈও বিজেপিৰ কৰ্ম-কৰ্তাসকলক আহ্বান জনায় । বিটিআৰ চুক্তিৰ প্ৰশংসাত পঞ্চমুখ হৈ পৰা মুখ্যমন্ত্ৰী সৰ্বানন্দ সোণোৱালে ক’লে, এই চুক্তিয়ে কোকৰাঝাৰ, চিৰাং, বাক্সা, ওদালগুৰিৰ সকলো ৰাইজৰ সমান্তৰালভাৱে উন্নয়নৰ লগতে শান্তি-সম্প্ৰতি আৰু সামাজিক সুৰক্ষাৰ ক্ষেত্ৰত উল্লেখযোগ্য ভূমিকা গ্ৰহণ কৰিব । আগন্তুক সময়ছোৱাত বিটিএডিৰ ৰাইজে বিজেপি দলক আন্তৰিকতাৰে আঁকোৱালি লব বুলি আশা প্ৰকাশ কৰি বৰাক-ব্ৰহ্মপুত্ৰ, পাহাৰ-ভৈয়ামৰ সকলো শ্ৰেণীৰ ৰাইজৰ সম উন্নয়ন আৰু সম মৰ্যদাত বিজেপি চৰকাৰে প্ৰাধান্য দি আহিছে । কংগ্ৰেছৰ দৰে বিজেপি চৰকাৰে হিতাধিকাৰী বাচনিৰ ক্ষেত্ৰত, জবকাৰ্ডৰ ক্ষেত্ৰত, ভূমি পট্টা প্ৰদানৰ ক্ষেত্ৰত বা মধ্যাহ্ন ভোজনৰ আঁচনিৰ ক্ষেত্ৰত কোনো ধৰণৰ কেলেংকাৰী, দুৰ্নীতি সংঘটিত কৰা নাই বুলি দাবী কৰে মুখ্যমন্ত্ৰীয়ে ৷
উল্লেখ্য যে, কোকৰাঝাৰত অনুষ্ঠিত হোৱা বিজেপি দলৰ অনুসূচিত জনজাতি মৰ্চাৰ প্ৰথমখন কাৰ্য নিৰ্বাহক বৈঠকত অংশগ্ৰহণ কৰাৰ পূৰ্বে বাথৌ পূজা মণ্ডপত সেৱা লৈ বডোফা উপেন্দ্ৰনাথ ব্ৰহ্মৰ প্ৰতিচ্ছবিত শ্ৰদ্ধাঞ্জলি জ্ঞাপন কৰে । তদুপৰি ভাষণ প্ৰসংগত মুখ্যমন্ত্ৰীয়ে জনজাতি সম্প্ৰদায়ৰ মাজত অধ্যায়নশীলতাৰ ওপৰত গুৰুত্ব আৰোপ কৰিবলৈ আহ্বান জনাই জ্ঞানেৰে ধনী হোৱাৰ আহ্বান জনায় মুখ্যমন্ত্ৰী সৰ্বানন্দ সোণোৱালে ।
