চিটাৰা ডেস্ক, 1 অক্টোবৰ: 27 অক্টোবৰত ছবিগৃহত মুক্তি লাভ কৰিছে কংগনা ৰনৌতৰ ছবি তেজস । কংগনাৰ ছবিখনে সমালোচক আৰু অনুৰাগীৰ পৰা মিশ্ৰিত সমালোচনা লাভ কৰিছে । কিন্তু বক্স অফিচত ছবিখনৰ বজাৰ একেবাৰে ঠাণ্ডা ৷ আনকি বাজেট পূৰণ কৰাটোও তেজসৰ বাবে কঠিন হৈ পৰিছে । তেজসৰ লাইফটাইম কালেকচন ১০ কোটি টকাৰ ওপৰত নাযাব বুলি অনুমান কৰা হৈছে । কাৰণ দৰ্শকক ছবিগৃহত আকৰ্ষণ কৰিবলৈ ব্যৰ্থ হৈছে কংগনাৰ তেজসে ৷ যাৰ বাবে এতিয়া তেজসৰ শ্ব’ বাতিল কৰাৰ সিদ্ধান্ত লোৱা হৈছে ।
দেশজুৰি তেজসৰ শ্ব’ বাতিল কৰাৰ কথা বহু প্ৰদৰ্শকে কৈছে । কৈছে যে ছবিখন চাবলৈ অতি কম সংখ্যক লোক অহাৰ বাবে ৫০ শতাংশ শ্ব’ বাতিল কৰা হৈছে ।
ছবিগৃহত ১০০ জনতকৈও কম লোক আহিছিল তেজস চাবলৈ
মুম্বাইৰ গেইটি গেলেক্সিৰ স্বত্বাধিকাৰী মনোজ দেশায়ে কংগনাৰ তেজস শ্ব’ বাতিলৰ সন্দৰ্ভত শেহতীয়াকৈ সংবাদ মাধ্যমৰ সৈতে বাৰ্তালাপ কৰে ৷ য’ত তেওঁ কয়- ‘‘দেওবাৰে মাত্ৰ ১০০ গৰাকী দৰ্শক আহিছিল । বাকী থকা শ্ব’বোৰত ১০০ গৰাকীতকৈও কম লোক আহিছিল ছবিখন চাবলৈ । ইমানৰ পিচতো আমি সপ্তাহৰ দিনকেইটাত গেইটিত তেজসৰ শ্ব’ অব্যাহত ৰাখিছো । এই ছবিখন সৰু অ’ডিত চলিব নোৱাৰিব ।’’
