চিটাৰা ডেস্ক, 1 অক্টোবৰ : শুকুৰবাৰে 30 ছেপ্টেম্বৰ হোৱাইট হাউচত অনুষ্ঠিত ডেম’ক্ৰেটিক নেশ্যনেল কমিটিৰ মহিলা নেতৃত্ব মঞ্চত আমেৰিকাৰ উপ-ৰাষ্ট্ৰপতি কমলা হেৰিছৰ সাক্ষাৎকাৰ গ্ৰহণ কৰে গ্ল’বেল ষ্টাৰ প্ৰিয়ংকা চোপ্ৰাই । ইয়াত প্ৰিয়ংকাক হালধীয়া ৰঙৰ বেকলেছ ড্ৰেছ আৰু একেই ৰঙৰ হীলছ্ পিন্ধি থকা দেখা গৈছিল । প্ৰিয়ংকাই আমেৰিকাৰ উপ-ৰাষ্ট্ৰপতি গৰাকীক আমেৰিকাত পে-ইকুৱালিটী আৰু বন্দুক আইন আদি বহুতো গুৰুত্বপূৰ্ণ বিষয়ত প্ৰশ্ন কৰিছিল । মন কৰিবলগীয়া যে স্বামী নিক জোনাছ আৰু কন্যা মালতী মেৰী চোপ্ৰাৰ সৈতে প্ৰিয়ংকা বৰ্তমান ভ্ৰমণত আছে ।
কমলা হেৰিছৰ সাক্ষাৎকাৰ গ্ৰহণ কৰে প্ৰিয়ংকাই
সাক্ষাৎকাৰটোত প্ৰিয়ংকা চোপ্ৰাই তেওঁৰ কেৰিয়াৰ সম্পৰ্কে বহুতো গুৰুত্বপূৰ্ণ তথ্য প্ৰকাশ কৰে । প্ৰিয়ংকাই কয় যে তেওঁৰ 22 বছৰীয়া কেৰিয়াৰত এই বছৰ প্ৰথমবাৰৰ বাবে তেওঁ পুৰুষ সহ-অভিনেতাৰ সমান মাচুল লাভ কৰিছে ।
প্ৰিয়ংকা চোপ্ৰাই ৱাশ্বিংটন ডিচিৰ পৰা তেওঁৰ কিছুমান ফটো ছ’চিয়েল মিডিয়াত শ্বেয়াৰ কৰিছে । অভিনেত্ৰীগৰাকীয়ে ছ'চিয়েল মিডিয়াত ৱাশ্বিংটন মনুমেণ্টৰ এখন ফটো, হোৱাইট হাউচৰ ভিতৰৰ এক আভাস আৰু তেওঁৰ হাতত থকা পানীয়ৰ এখন ছবিও শ্বেয়াৰ কৰিছে, য'ত ৰাষ্ট্ৰপতিৰ মোহৰ আছে ।
উচ্চতম ন্যায়ালয়ৰ সিদ্ধান্তৰ শলাগ লৈছে প্ৰিয়ংকা চোপ্ৰাই
শেহতীয়াকৈ ভাৰতৰ উচ্চতম ন্যায়ালয়ে ৰায়দান কৰে যে অবিবাহিত ছোৱালীৰো গৰ্ভপাতৰ ক্ষেত্ৰত সমানে অধিকাৰ থাকিব । ভাৰতৰ উচ্চতম ন্যায়ালয়ে গৰ্ভপাতক বৈধ কৰাৰ সিদ্ধান্তক প্ৰিয়ংকাই শলাগ লৈছে । প্ৰিয়ংকাই ইনষ্টাগ্ৰাম ষ্ট’ৰীত শ্বেয়াৰ কৰি লিখিছে, ‘ৰাইট টু চয়ছ’ । সমগ্ৰ বিশ্বৰ মহিলাসকলৰ বাবে এইটোৱেই একমাত্ৰ উপায় হ’ব লাগে । এটা প্ৰগতিশীল পদক্ষেপ !!!
নিকে ল’লে মালতীৰ যত্ন
আনহাতে ছ'চিয়েল মিডিয়া একাউণ্টত নিক জোনাছে জীয়েক মালতী মেৰী চোপ্ৰা জোনাছৰ সৈতে এখন ফটো শ্বেয়াৰ কৰিছে, য'ত কন্যা সন্তানক চম্ভালি থকা দেখা গৈছে নিকক । নিকে তেওঁলোকৰ বনভোজৰ পৰা দুয়োজনৰ এখন ফটো শ্বেয়াৰ কৰি শিৰোনামত লিখিছে, 'এনৱাইচিত দেউতা কন্যাৰ দুঃসাহসিক অভিযান' ।
লগতে পঢ়ক : প্ৰিয়ংকা চোপ্ৰাৰ পোলেণ্ড ভ্ৰমণ, ৰাছিয়াৰ যুদ্ধত ক্ষতিগ্ৰস্ত ইউক্ৰেইনৰ শিশুসকলৰ বাবে সহায়ৰ হাত
