চিটাৰা ডেস্ক, ২৪ আগষ্ট: সম্প্ৰতি চন্দ্ৰযান ৩ ৰ সফলতা উদযাপন কৰিছে দেশে । বুধবাৰে সন্ধিয়া প্ৰায় ৬:৪০ বজাত চন্দ্ৰযান ৩ ৰ লেণ্ডাৰে চন্দ্ৰৰ ভূমিত ভৰি দিয়ে আৰু ইয়াৰ লগে লগে ভাৰতে ইতিহাসৰ সৃষ্টি কৰে । ইছৰোৰ এই সফলতাক লৈ চলচ্চিত্ৰ নিৰ্মাতাসকলো উৎফুল্লিত । এতিয়া এই সফলতাৰ পিচতে বলীউডৰ পৰা আহিছে এটা খবৰ ৷ মিছন মংগলৰ পৰিচালক জগন শক্তিয়ে কয় যে তেওঁ চন্দ্ৰযান ৩ৰ সফলতাক ডাঙৰ পৰ্দাত দেখুৱাব ।
এটা ৱেবছাইটৰ সৈতে হোৱা কথা-বতৰাত জগন শক্তিয়ে কয় যে তেওঁ এই সুযোগ এৰি নিদিয়ে । তেওঁ লগতে কয় যে তেওঁ কেৱল চন্দ্ৰযান-৩ ত নিৰ্মাণ হ’বলগীয়া ছবিখনত মিছন মংগলত কাম কৰা দলটোকহে ল’ব বিচাৰে । তেওঁ কয় যে মই মিছন মংগলৰ দলৰ সৈতে চন্দ্ৰযান ৩ ৰ ওপৰত এখন ছবি নিৰ্মাণ কৰিম । অৱশ্যে ছবিখনত অক্ষয় কুমাৰৰ কামৰ সন্দৰ্ভত তেওঁ একো স্পষ্ট কৰা নাই ৷
মিছন মংগলত কোন কোন আছিল ?
অক্ষয় কুমাৰ, বিদ্যা বালান, তাপসী পান্নু, সোনাক্ষী সিনহা, কীৰ্তি কুলহাৰী, নীতি মেনন, শৰ্মন যোশী আদি তাৰকাক লৈ ২০১৯ বৰ্ষত মিছন মংগল ছবিখন নিৰ্মাণ কৰিছিল । বক্স অফিচত অতি সফল হোৱা এই ছবিখনে বিশ্বজুৰি প্ৰায় ২৯০ কোটি টকাৰ ব্যৱসায় কৰিছিল । উল্লেখ্য যে পূৰ্বৰ ছবিখনৰ অভিজ্ঞতা বা চন্দ্ৰযান-৩ৰ উন্মাদনা, জগন শক্তিয়ে এই ডাঙৰ সুযোগটো এৰিব নোখোজে ৷
জগন শক্তিয়ে জনাইছে যে তেওঁৰ ডাঙৰ ভগ্নী ইছৰোৰ জ্যেষ্ঠ বিজ্ঞানী । তেওঁ কয় যে তেওঁ ভগ্নীৰ পৰা চন্দ্ৰযান ৩ সম্পৰ্কীয় তথ্য লৈছে আৰু এই অভিযানৰ সফলতাৰ লগে লগে তেওঁ এখন ছবি নিৰ্মাণৰ কথা চিন্তা কৰিবলৈ আৰম্ভ কৰিছে । তাৎপৰ্যপূৰ্ণভাৱে যেতিয়া মিছন মংগল নিৰ্মাণ আৰম্ভ হৈছিল তেতিয়া জগন শক্তিয়ে ইছৰ’ৰ বিজ্ঞানীসকলৰ পৰা সহায় লৈছিল । ছবিখনত অক্ষয় মুখ্য চৰিত্ৰত অভিনয় কৰিছিল আৰু বিদ্যা বালানকে ধৰি আন অভিনেত্ৰীসকলেও তেওঁক সহায় কৰিছিল ।
লগতে পঢ়ক: Chandrayaan 3: অনুপম খেৰ, আৰ মাধৱনৰ লগতে বহু চেলিব্ৰিটিয়ে চন্দ্ৰযান ৩ৰ সফলতাৰ বাবে কৰিছে প্ৰাৰ্থনা
