চিটাৰা ডেস্ক, ১২ ডিচেম্বৰ: অভিনেত্ৰী তৃষা কৃষ্ণণ আৰু মনছুৰ আলী খানৰ মাজত হোৱা বিবাদে যথেষ্ট দিনৰ পৰা বাতৰিৰ শিৰোনাম দখল কৰি আহিছে । দক্ষিণৰ অভিনেতা মনছুৰে অভিনেত্ৰীগৰাকীক লৈ অশ্লীল মন্তব্য কৰাৰ পিছৰে পৰা এই বিষয়টোক লৈ ছ’চিয়েল মিডিয়াত ব্যাপক চৰ্চা আৰম্ভ হৈছিল ৷ ইয়াৰ পিচতে মনছুৰে তৃষাৰ ওচৰত নিজৰ মন্তব্যৰ বাবে ক্ষমা বিচাৰিছিল । কিন্তু ক্ষমা বিচাৰি আকৌ লুটি বাগৰ মাৰি মনছুৰে তৃষা, চিৰঞ্জীৱী আৰু খুশবু সুন্দৰৰ বিৰুদ্ধে মানহানিৰ গোচৰ ৰুজু কৰে। এতিয়া এই সন্দৰ্ভত আদালতৰ সিদ্ধান্ত পোহৰলৈ আহিছে ।
প্ৰাপ্ত তথ্য অনুসৰি মাদ্ৰাজ উচ্চ ন্যায়ালয়ে বিষয়টো সন্দৰ্ভত মনছুৰ আলী খানক তীব্ৰ গৰিহণা দিছে । দৰাচলতে তৃষা, চিৰঞ্জীৱী আৰু খুশবু সুন্দৰৰ পৰা ১ কোটি টকাকৈ ক্ষতিপূৰণৰ দাবী কৰাৰ বাবে মনছুৰক আদালতে এই গৰিহণা দিছে । অভিনেতাজনে অভিযোগ কৰিছিল যে তিনিওগৰাকীয়ে তেওঁৰ বক্তব্য নিশ্চিত নকৰাকৈয়ে ৰাজহুৱাভাৱে তেওঁৰ বিৰুদ্ধে অপমানজনক বক্তব্য দিছিল । সোমবাৰে এই বিষয়টোত আদালতে শুনানি গ্ৰহণ কৰে ।
ন্যায়াধীশ এন সতীশ কুমাৰে প্ৰশ্ন উত্থাপন কৰে যে তৃষাৰ সলনি মনছুৰে কিয় মানহানিৰ গোচৰ দাখিল কৰিলে ? তেওঁ প্ৰশ্ন কৰে যে কেৱল গ্ৰেপ্তাৰৰ পৰা হাত সাৰিবলৈ বিনাচৰ্তে ক্ষমা খুজিছে নেকি ? তেওঁৰ পৰিৱৰ্তে তৃষাই ক্ষতিপূৰণৰ বাবে গোচৰ তৰিব লাগিছিল । কিন্তু মনছুৰে কিহৰ ভিত্তিত আদালতলৈ আহিছে ? আদালতে তেওঁক সোধা-পোছা কৰে আৰু তেওঁৰ অধিবক্তাক ৰাজহুৱা স্থানত কেনেকৈ দায়িত্বশীলভাৱে কাম কৰিব লাগে সেই বিষয়ে মনছুৰক পৰামৰ্শ দিবলৈ অনুৰোধ জনায় । ন্যায়াধীশগৰাকীয়ে তৃষা, চিৰঞ্জীৱী আৰু খুশবুকো এই গোচৰৰ উত্তৰ দিবলৈ নিৰ্দেশ দিছে ।
মনছুৰে কয় যে তেওঁ কোনো ব্যক্তিৰ বিষয়ে কোনো ভুল বক্তব্য দিয়া নাছিল । তেওঁৰ আবেদনত লিখা আছে যে তেওঁ নিজৰ নেতিবাচক চৰিত্ৰৰ কথাহে কৈছিল যিবোৰ তেওঁ বহু ছবিত কৰিছিল । অভিনেতাজনে কয় যে তেওঁ তৃষা বা কোনো মহিলাৰ বিৰুদ্ধে কোনো মন্তব্য কৰা নাছিল ।
লগতে পঢ়ক: তৃষা, খুশবু সুন্দৰ আৰু চিৰঞ্জীৱীৰ বিৰুদ্ধে মানহানিৰ গোচৰ ৰুজু তৰিব মনছুৰ আলী খানে
