চিটাৰা ডেস্ক, ২৮ ছেপ্টেম্বৰ: এটা বছৰতে দুটাকৈ ব্লকবাষ্টাৰ ছবি দৰ্শকক উপহাৰ দিছে বলীউডৰ কিং শ্বাহৰুখ খানে ৷ বছৰটোৰ আৰম্ভণিতে ‘পাঠান’ৰ জৰিয়তে চাৰি বছৰ পিচত পুনৰ ৰূপালী পৰ্দালৈ ঘূৰি আহিছিল শ্বাহৰুখ খান আৰু ছবিখন মুক্তিৰ পাচতে বক্স অফিচত আলোড়নৰ সৃষ্টি কৰে ৷ ছবিখনে বিশ্বব্যাপী বক্স অফিচত সংগ্ৰহ কৰে ১০০০ কোটি টকা ৷ ইফালে পাঠানৰ সফলতাৰ পাচতে বক্স অফিচত মুকলি হয় কিং খানৰ আন এক ব্লকবাষ্টাৰ ছবি ‘জৱান’ ৷ ৭ ছেপ্টেম্বৰত ছবিগৃহত মুকলি হয় জৱান ৷ মুক্তিৰ পিচতে বহু ছবিৰ অভিলেখ ভংগ কৰি সম্প্ৰতি ১০০০ কোটি টকাৰ ক্লাবত সোমাইছে ছবিখন ৷
কিন্তু এই দুখন ছবিৰেই বছৰটো সীমাবদ্ধ নকৰে কিং খানে ৷ এই বছৰটোত আন এখন ছবিৰে পুনৰ পৰ্দালৈ ঘূৰি আহিব কিং খান ৷ কিং খানৰ পৰৱৰ্তী প্ৰজেক্ট হৈছে ডাংকি ৷ পাঠান আৰু জৱানৰ পিচত এই ছবিখনক লৈ অনুৰাগীৰ মাজত বৃদ্ধি পাইছে উৎসুকতা ৷ শেহতীয়াকৈ শ্বাহৰুখে টুইটাৰত #asksrk চেচন কৰিছিল, য’ত তেওঁ ছবিখনৰ সৈতে জড়িত বহু প্ৰশ্নৰ উত্তৰ দিছিল অনুৰাগীক । এইখিনিতে উল্লেখ কৰিব লাগিব যে প্ৰায়েই অভিনেতাগৰাকীয়ে অনুৰাগীৰ সৈতে #asksrk চেচনৰ জৰিয়তে বাৰ্তালাপ কৰে ৷
টুইটাৰত এজন অনুৰাগীৰ প্ৰশ্নৰ উত্তৰ দি শ্বাহৰুখ খানে কয় যে ডাংকি সাজু হৈছে । এজন অনুৰাগীয়ে সুধিলে, "ছাৰ, ডাংকি কেনেকৈ বনোৱা হৈছে ? " যাৰ উত্তৰত শ্বাহৰুখে ক’লে, "#ডাংকি বনোৱা হৈছে আৰু বহুত ধুনীয়া হৈছে...আমাৰ সকলোৰে জীৱনৰ দৰেই কিছু ।" আন এজন অনুৰাগীয়ে ডাংকিৰ মুক্তিৰ তাৰিখৰ সন্দৰ্ভত প্ৰশ্ন কৰি লিখিছে, "ডাংকিৰ মুক্তিৰ তাৰিখ এইটোৱে থাকিব নে সলনি কৰিব ? #AskSRK" ৷ ইয়াৰ উত্তৰত কিং খানে উত্তৰ দিলে, "#dunkifixed... আৰু কি কৰিম ? এতিয়া কপালত ডাংকিৰ ৰিলিজ ডেটৰ টেটু কৰিব লাগিব নেকি ? "
ডাংকিৰ পৰিচালক কোন ?
শ্বাহৰুখৰ আটাইতকৈ প্ৰত্যাশিত ছবি ডাংকি নিৰ্মাণ কৰিছে ৰাজকুমাৰ হিৰাণীয়ে । ৩-ইডিয়টছৰ দৰে ব্লকবাষ্টাৰ কমেডী ছবি নিৰ্মাণ কৰা হিৰাণীয়েও ডাংকিত নিজৰ হাস্যৰস সংযোগ কৰিব ৷
ডাংকিৰ অভিনেতা-অভিনেত্ৰী
শ্বাহৰুখ খানৰ বাহিৰেও ডাংকিত থাকিব আন বহু ডাঙৰ ডাঙৰ অভিনেতা । ইয়াৰ ভিতৰত আছে তাপসী পান্নু, বোমন ইৰাণী, বিকি কৌশল আৰু সতীশ শ্বাহ ।
ছবিখনৰ কাহিনী কি ?
শ্বাহৰুখ খানৰ ‘ডাংকি’ এখন উচ্চ পৰ্যায়ৰ ছবি । এই ছবিখনত কমেডীৰ লগতে থাকিব ড্ৰামা । ডাংকিৰ কাহিনী আমেৰিকা/কানাডাত অবৈধ ভাৰতীয় অনুপ্ৰৱেশকাৰীৰ বিষয়টোৰ ওপৰত আধাৰিত বুলি জানিব পৰা গৈছে । অৱশ্যে ছবিখনৰ কাহিনীৰ সন্দৰ্ভত কোনো আনুষ্ঠানিক তথ্য প্ৰকাশ কৰা নাই নিৰ্মাতাসকলে ।
ডাংকি কেতিয়া মুক্তি পাব ?
চলিত বৰ্ষৰ ২২ ডিচেম্বৰত মুক্তি পাব ডাংকি । বৰদিনৰ বন্ধৰ পূৰ্বে ভাৰতকে ধৰি আন্তঃৰাষ্ট্ৰীয় পৰ্যায়ত ছবিখন মুক্তি দিয়াৰ পৰিকল্পনা কৰা হৈছে ।
লগতে পঢ়ক: Jawan Collection Day 21: বুধবাৰে কিমান উপাৰ্জন কৰিলে জৱানে ? জৱানৰ বিশ্বব্যাপি সংগ্ৰহ জানি লওক
