বাক্সা, 10 এপ্ৰিলঃ বাক্সাত বিশাল ৰেলীৰে কোকৰাঝাৰ সমষ্টিৰ বৰ্তমানৰ সাংসদ নৱকুমাৰ শৰণীয়াৰ পদযাত্ৰা ৷ নিজৰ এক নিৰ্বাচনী কাৰ্যালয় মুকলি কৰি ভোটাৰ ৰাইজৰ সৈতে বাৰ্তালাপ কৰে কোকৰাঝাৰ সমষ্টিৰ নিৰ্দলীয় প্ৰাৰ্থীগৰাকীয়ে ৷
হাগ্ৰামাক বিটিচি ঘৰিয়াল আখ্যা দি সাংসদ নৱকুমাৰ শৰণীয়াই কয় যে, "কোকোৰাঝাৰ লোকসভা সমষ্টিত কোনো প্ৰাৰ্থীয়ে প্ৰতিদ্বন্দিতাত নাহে ৷ মই দ্বিতীয়বাৰৰ বাবে এগৰাকী সাধাৰণ সেনা জোৱানৰ সন্তান হৈ ৰাইজৰ সেৱা কৰি যাবলৈ নিৰ্বাচনত অৱতীৰ্ণ হৈছো ৷ ৰাজনীতি মোৰ নিচাও নহয়, পেছাও নহয় ৷ একমাত্ৰ ৰাইজৰ প্ৰয়োজনত নিৰ্বাচন খেলিছো ৷ বিটিচিৰ অবড়ো ৰাইজ প্ৰাপ্যৰ পৰা বঞ্চিত হৈ আছে ৷ সেয়ে মই অকল বিটিচিৰ জনসাধাৰনৰ নিৰাপত্তা নিশ্চিত কৰাৰ কাৰণেহে ৰাজনীতি কৰিছো ৷ অ-বড়ো ৰাইজ কোনো মূল্যৰ বিনিময়ত বিক্ৰী হোৱা মানুহ নহয় ৷ সেইবাবে মই দ্বিতীয়বাৰৰ বাবেও সংসদলৈ যাম ৷"
বুধবাৰে তামুলপুৰৰ ৰাজপথত লগত সমৰ্থক লৈ নৱকুমাৰ শৰণীয়াই নিজ মাতৃৰ সৈতে এক সমদল বাহিৰ কৰে ৷ নৱকুমাৰ শৰণীয়া জিন্দাবাদ, নৱকুমাৰ শৰণীয়াক টৰ্চৰ ছবিত ভোট দিয়ক আদি শ্লোগান দি তামুলপুৰৰ ৰাজপথত বৃহৎ সমদল বাহিৰ কৰে ৷ নৱকুমাৰ শৰণীয়াৰ মাতৃয়ে কয় যে, "ভাৰতীয় সেনা জোৱানৰ পুত্ৰ হৈ দেশৰ সেৱা কৰি যাব মোৰ পুত্ৰই ৷ এই আশীৰ্বাদ দিছো মোৰ পুত্ৰক ৷ মোৰ স্বামীয়ে এসময়ত সেনা জোৱান ৰূপে চীন আৰু বাংলাদেশৰ সতে যুদ্ধ কৰি দেশৰ সেৱা কৰি গৈছে ৷ সেয়ে আজি তেওঁৰ পুত্ৰ হৈ মোৰ ল’ৰাই দেশৰ সেৱা কৰি যাব বুলি মোৰ দৃঢ় বিশ্বাস আছে ৷"
