বিমান বন্দৰৰ সমুখত বাহন হাইজেক কৰি অস্ত্ৰ সহ আটক দুই যুৱক

মাৰণাস্ত্ৰ সহ ৰাইজৰ হাতত আটক হ’ল দুই যুৱক ৷ দিন দুপৰতে বিমানবন্দৰৰ সমীপত বাহন হাইজেক কৰি আটক হ’ল যুৱকদ্বয় ৷

কাছাৰ, 31 অক্টোবৰ : কাছাৰত মাৰণাস্ত্ৰসহ ৰাইজৰ হাতত আটক হ’ল দুই যুৱক ৷ দিন দুপৰতে এখন বাহন হাইজেক কৰাৰ সময়ত ৰাইজৰ হাতত ধৰা পৰিল যুৱক দুজন ৷ এই ঘটনা সংঘটিত হয় শিলচৰ চহৰৰ কুম্ভীৰগ্ৰাম বিমানবন্দৰৰ সম্মুখত ৷ ঘটনা অনুসৰি, দেওবাৰে পুৱাই বিমানবন্দৰলৈ যোৱাৰ কথা কৈ শিলচৰ চহৰৰ পৰা এখন অল্টো বাহন ভাড়া কৰিছিল বিক্ৰমজিৎ আৰু বিক্ৰানজিৎ নামৰ যুৱক দুজনে ৷

উদ্ধাৰ হোৱা মাৰণাস্ত্ৰ

কিন্তু বিমানবন্দৰ পোৱাৰ পাছতো বাহনৰ পৰা নমাৰ নাম নল’লে এজনেও ৷ আনকি, চালকক বন্দুক দেখুৱাই বাহনখন হাইজেক কৰাৰ চেষ্টা কৰে যুৱক দুজনে ৷ উপায়হীন হৈ পৰিল বাহনখনৰ চালকজন ৷ নিশ্চিত বিপদ সমুখত দেখি প্ৰাণ ৰক্ষা কৰিবলৈ চলন্ত গাড়ীৰ পৰা জাপ দিয়ে চালকজনে ৷ লগে লগে এই ঘটনা চকুত পৰে সেই স্থানত উপস্থিত লোক সকলৰ ৷

লগে লগে লোক সকলে আগবাঢ়ি গৈ দুই যুৱকক আটক কৰিবলৈ সক্ষম হয় ৷

ৰাইজে দুই যুৱকক তালাচী চলাই চাৰিটাকৈ পিষ্টল সহ কেইবা জাঁই সজীৱ গুলি আৰু একাধিক মৰাণাস্ত্ৰ উদ্ধাৰ কৰে ৷ সম্প্ৰতি দুয়ো উদাৰবন্দ আৰক্ষী থানাত আৰক্ষাৰ জিম্মাত আছে বুলি জানিব পৰা গৈছে ৷ তদন্তৰ খাতিৰত আৰক্ষীয়ে দুয়োকে জেৰা চলাই থকাৰ কথা জানিব পৰা গৈছে ৷ ধৃত যুৱক দুজন কোনোবা উগ্ৰপন্থী সংগঠনৰ সদস্য হ’ব পাৰে বুলি আৰক্ষীয়ে প্ৰাথমিকভাৱে অনুমান কৰা বুলি বিশেষ সূত্ৰে জানিব পৰা গৈছে ৷

লগতে পঢ়ক : আৰক্ষীৰ জালত ঘোষ ব্ৰাডাৰ্চৰ স্বত্বাধিকাৰী প্ৰতুল ঘোষ