দলগাঁও, 26 জুন : কৰ'ণাৰ (Covid-19) ভয়াৱহ পৰিস্থিতিৰ মাজতেই ৰাজ্যত বহু সৰু বৰ বিক্ষিপ্ত ঘটনা সংঘটিত হৈছে ৷ ইয়াৰ বিপৰীতে ড্ৰাগছ (Drugs) সৰবৰাহ, ডকাইত,চোৰাং গৰু সৰবৰাহ, চোৰাং কাঠ সৰবৰাহ ইত্যাদি বিভিন্ন অপৰাধজনিত কাণ্ডৰ বিৰুদ্ধে তীব্ৰ অভিযানত অব্যাহত ৰাখিছে অসম আৰক্ষীয়ে (Assam Police) ৷ আৰক্ষীৰ অভিযানত ৰাজ্যৰ বিভিন্ন প্ৰান্তত জব্দ হৈছে কোটি-কোটি টকাৰ ড্ৰাগছৰ লগতে আটক কৰিছে বহুকেইটা ড্ৰাগছ মাফিয়া, চোৰ-ডকাইতৰ লগতে চোৰাং কাঠ সৰবৰাহকাৰীক ৷
সমান্তৰালকৈ, দলং জিলাতো সংঘটিত হৈছে বহু অপৰাধমূলক ঘটনা ৷ ইয়াৰ বিৰুদ্ধে আৰক্ষীয়েও চলাইছে তীব্ৰৰ পৰা তীব্ৰতৰ অভিযান ৷ ইফালে এক গোপন খবৰৰ ভিত্তিত দৰং জিলাৰ উত্তৰ কামৰূপ বন সংমণ্ডল বিষয়াৰ নিৰ্দেশত চোৰাং কাঠ সৰবৰাহকাৰীৰ বিৰুদ্ধে মঙলদৈ আৰু কামৰূপ সংমণ্ডলৰ বন বিভাগে (Forest Department) যুটীয়া অভিযান চলায় ৷ বন বিভাগৰ অভিযানত দলগাঁৱৰ বেচিমাৰী আৰু বাৰৈপাৰা গাঁৱৰ পৰা অবৈধভাৱে চলি থকা দুটাকৈ কাঠ ফলা মিল জব্দ (Seized) কৰে ৷ জব্দকৃত মেচিন কেইটাৰ মূল্য তিনি লাখ টকা হ'ব বুলি আৰক্ষীয়ে অনুমান কৰিছে ৷
আনহাতে, বন বিভাগৰ বিষয়াই জানিব দিয়া মতে বন বিভাগৰ অভিযানৰ কথা গম পাই কেইবাটাও কাঠ ফলা মিলৰ যন্ত্ৰ পাতি খুলি লৈ পলায়ন কৰে অবৈধ মিলৰ মালিক আৰু কৰ্মচাৰী সকলে ।
ইফালে চোৰাং কাঠ সৰবৰাহকাৰী কেইটাক আটক কৰিবলৈ যোৰদাৰ অভিযান অব্যাহত ৰাখিছে বুলি বন বিভাগৰ বিষয়া কৰ্মচাৰী সকলে সাংবাদিকৰ আগত সদৰি কৰিছে ৷ উল্লেখ্য যে, যিটো সময়ত পৰিৱেশৰ ভাৰসাম্যতা ৰক্ষা কৰিবলৈ বিভিন্ন সংবাদমাধ্যম তথা কাগজে পত্ৰই সজাগতাৰ বাতৰি প্ৰকাশ হৈ আহিছে সেই সময়তে একাংশ দুষ্ট চক্ৰই চলাই গৈছে প্ৰকৃতিৰ বুকুত অবাধ ধ্বংসলীলা ৷ ৰাজ্যৰ বিভিন্ন বনাঞ্চলৰ পৰা চোৰাংভাৱে মূল্যবান গছ গছনি কাটি লুটিছে লাখ লাখ টকা ৷ এই ঘটনাৰ বিৰুদ্ধে বিভিন্ন দল সংগঠন তথা ৰাইজে তীব্ৰ প্ৰতিবাদ কৰি আহিছে ৷
ইফালে আৰক্ষী অথবা বন বিভাগেও অভিযান অব্যাহত ৰাখিছে যদিও কোনো ঠাইত এতিয়াও চলিয়েই আছে চোৰাং কাঠৰ সৰবৰাহ ৷ শীঘ্ৰেই এই চোৰাং কাঠ সৰবৰাহ বন্ধ কৰিবলৈ চৰকাৰ তথা বন বিভাগক আহ্বান জনাইছে ৰাজ্যৰ সচেতন লোক সকলে ৷
লগতে পঢ়ক-মহানগৰীত দিন দুপৰতে দুটাকৈ ধন লুটৰ ঘটনা
