ডিফু, 5মে': বোকাজানৰ দিলাওজান অঞ্চলৰ বুধিয়া গাঁৱত সংঘটিত হৈছে এক জঘন্য ঘটনা । ফুৰাবলৈ নিয়াৰ চলৰে এগৰাকী কিশোৰীক যৌন নিৰ্যাতন চলোৱা অভিযোগ এজন চিআৰপিএফ জোৱানৰ বিৰুদ্ধে ৷ ইতিমধ্যে উক্ত ঘটনাৰ সংঘটিত কৰাৰ অপৰাধত আৰক্ষীয়ে আটক কৰিছে ইলিয়াড বাণ্ডা নামৰ এজন চিআৰপিএফৰ জোৱান ৷
উল্লেখ্য যে, ইলিয়াড বাণ্ডা নামৰ চিআৰপিএফ জোৱানজনে ছুটীলৈ আহি নিজ কন্যাৰ সৈতে আন চাৰিগৰাকী বান্ধৱীক লৈ শনিবাৰে ফুৰিবলৈ লৈ গৈছিল ৷ যদিও উভতি আহোতে এগৰাকী কিশোৰীক ইলিয়াড বাণ্ডাই যৌন নিৰ্যাতন চলোৱা বুলি গুৰুতৰ অভিযোগ উত্থাপন কৰিছে কিশোৰী কেইগৰাকীয়ে । ইফালে ইলিয়াড বাণ্ডাৰ বিৰুদ্ধে বোকাজান আৰক্ষী থানাত 76/2021 নম্বৰত এক গোচৰ ৰুজু কৰিছে কিশোৰীগৰাকীৰ পৰিয়ালে ৷
ইফালে উক্ত গোচৰৰ ভিত্তিত বোকাজান আৰক্ষীয়ে অভিযুক্ত ইলিয়াড বাণ্ডাক আটক কৰি তদন্ত অব্যাহত ৰাখিছে । ধৃত ইলিয়াড বাণ্ডা অৰুণাচলত চিআৰপিএফ জোৱান হিচাপে কৰ্মৰত বুলি জানিব পৰা গৈছে । উক্ত ঘটনাটোৰ বাবে এতিয়া অঞ্চলটোত তীব্ৰ চাঞ্চল্যই বিৰাজ কৰিছে ।
