মৰিগাওঁ, 12 জুলাই : মৰিগাঁৱৰ দক্ষিণ ধৰমতুলত সংঘটিত হোৱা মানৱ দেহৰ অংগৰ ব্যৱসায় (illegal organ trading)ৰ ঘটনাই লৈছে নতুন মোৰ ৷ দেওবাৰে মৰিগাঁও জিলাৰ দক্ষিণ ধৰমতুল গাঁৱত মানৱ শৰীৰৰ অংগৰ বিনিময়ত আগধন দিবলৈ গৈ এই চক্ৰটোৰ সৈতে জড়িত লিলিমাই বড়ো নামৰ মহিলাগৰাকী গাঁওৰক্ষী বাহিনী তথা আৰক্ষীৰ ফান্দত পৰিছিল ৷ ইয়াৰ পিছত এতিয়া পোহৰলৈ আহিছে চক্ৰটোৰ সৈতে জড়িত আন কিছু ব্যক্তিৰ নামৰ লগতে উদঘাটন হৈছে নতুন নতুন তথ্য ৷
জানিব পৰা মতে, ৰমেন মেধি নামৰ এজন লোকে ২০২০ বৰ্ষৰ লক ডাউনৰ সময়ত দক্ষিণ ধৰমতুলৰ এগৰাকী অসহায় পিতৃক নিজৰ জালত পেলাইছিল ৷ অসহায় লোকজনৰ হৃদৰোগত আক্ৰান্ত সন্তানৰ চিকিৎসা ব্যয় বহন কৰাৰ লগতে পাঁচ লাখ টকা দিয়াৰ প্ৰতিশ্ৰুতি প্ৰদান কৰিছিল ৰমেন মেধিয়ে ৷ পৰৱৰ্তী সময়ত ৰমেন মেধি, লিলিমাই বড়ো আৰু নিতু দাস আদি কেইজনমান ব্যক্তিয়ে লোকজনক কলিকতাৰ ৰবীন্দ্ৰনাথ ঠাকুৰ চিকিৎসালয়লৈ নি তেওঁৰ কিডনী উলিয়াই পাঁচ লাখৰ পৰিৱৰ্তে ডেৰ লাখ টকা দি পঠিয়াই দিয়ে ৷
চুক্তি অনুসৰি টকা দিয়াৰ লগতে কণমানিটোৰ চিকিৎসাৰ ব্যয় বহন কৰাৰ কথা আছিল যদিও পৰৱৰ্তী সময়ত পাভ লুটি মাৰিছিল চক্ৰটোৱে ।
ইয়াৰ পিছতে, প্ৰতাৰণাৰ বলি হোৱা লোকজনে সমগ্ৰ ঘটনাটো পোহৰলৈ আনে ৷ লগে লগেই আন এক নতুন তথ্য উন্মোচিত হয় যে ইতিমধ্যে গাঁওখনৰ বিশ জনতকৈ অধিক দুখীয়া অসহায় লোক এই চক্ৰটোৰ বলি হৈছে ৷ আনহাতে, কলিকতাৰ একেখন চিকিৎসালয়ত নিজৰ অংগ প্ৰদান কৰিবলৈ সাজু হৈ আছে গাঁওখনৰ আন পাঁচ গৰাকীকৈ লোক ৷
উল্লেখযোগ্য যে, এই চক্ৰটোৱে অসহায় দুখীয়া লোকক প্ৰথমে নিজৰ জালত পেলাই লয় ৷ পৰৱৰ্তী সময়ত,পৰিয়ালৰ লোকক অংগ দান কৰা বুলি চুক্তিত স্বাক্ষৰ কৰাই লৈ বহিঃৰাজলৈ নি ধনৰ বিনিময়ত শৰীৰৰ অংগ বিক্ৰী কৰিবলৈ প্ৰলোভিত কৰে ৷ অৱশেষত, এগৰাকী অসহায় পিতৃৰ স্বীকাৰোক্তিৰ পিছত দেওবাৰে গাঁওৰক্ষী বাহিনীৰ সহযোগত আৰক্ষীয়ে এই চক্ৰটোৰ এগৰাকী মাষ্টাৰ মাইণ্ড স্বৰূপ গুৱাহাটীৰ লিলিমাই বড়ো নামৰ মহিলা গৰাকীক আটক কৰে ৷
জানিব পৰা মতে, গাঁওখনৰ কোনো লোকক অংগ বিক্ৰীৰ বাবে আগধন দিবলৈ আহিছিল লিলিমাই বড়ো ৷ মানৱ শৰীৰৰ অংগৰ এই ভয়ানক বেহাই ইতিমধ্যে চাঞ্চল্যৰ সৃষ্টি কৰিছে সমগ্ৰ ৰাজ্যত ৷ অৱশ্যে, এই সম্পৰ্কত অতি তৎপৰতাৰে আৰক্ষীয়ে তদন্ত আৰম্ভ কৰিছে বুলি মৰিগাঁও জিলাৰ আৰক্ষী অধীক্ষক (SP Morigaon) গৰাকীয়ে সংবাদ মাধ্যমক জানিবলৈ দিছে ৷
লগতে পঢ়ক : ৰাজ্যত চলিছে মানৱ দেহৰ অংগৰ ভয়ংকৰ বেহা
