পৰ্যটকৰ বাবে মুকলি পানপুৰ সংৰক্ষিত বনাঞ্চল

অসমৰ পৰ্যটন মানচিত্ৰত পানপুৰ ঘাট তথা কাজিৰঙাৰ ষষ্ঠ সংযোজনৰ অন্তৰ্গত পানপুৰ বনাঞ্চলে স্থান লাভ কৰা পিচতে শেহতীয়াকৈ পৰ্যটকৰ বাবে আকৰ্ষণৰ কেন্দ্ৰবিন্দু হৈ পৰিছে এই পানপুৰঘাট ৷ পানপুৰ বনাঞ্চললৈ পৰ্যটকৰ সংখ্যা বৃদ্ধি কৰাৰ লক্ষ্যৰে পদক্ষেপ গ্ৰহণ কৰিছে কাজিৰঙা ৰাষ্ট্ৰীয় উদ্যান কৰ্তৃপক্ষই ৷

চতিয়া, ২১ নৱেম্বৰ : পৰ্যটকৰ সংখ্যা বৃদ্ধি কৰাৰ লক্ষ্যৰে কাজিৰঙা ৰাষ্ট্ৰীয় উদ্যান কৰ্তৃপক্ষই লৈছে নতুন নতুন পদক্ষেপ ৷ ব্ৰহ্মপুত্ৰৰ দক্ষিণ পাৰৰ কাজিৰঙাৰ পিছত উত্তৰ অসমৰ জামুগুৰিহাটৰ পানপুৰ সংৰক্ষিত বনাঞ্চলত দেওবাৰৰ পৰা মুকলি কৰা হয় জীপ চাফাৰি আৰু হাতী চাফাৰি ৷ কাজিৰঙা ৰাষ্ট্ৰীয় উদ্যানৰ অন্তৰ্গত বিশ্বনাথ বন্যপ্ৰাণী সংমণ্ডলৰ অধীনস্থ পানপুৰ বনাঞ্চলত আছে গড়, হাতী, বাঘকে আদি কৰি আন আন জীৱ-জন্তু ৷

ইক' টুৰিজিমৰ জৰিয়তে পানপুৰ বনাঞ্চলক পৰ্যটকৰ আকৰ্ষণৰ কেন্দ্ৰবিন্দু হিচাবে প্ৰতিষ্ঠা কৰাৰ উদ্দেশ্য আৰম্ভ কৰা হৈছে জীপ আৰু হাতী চাফাৰি ৷ ২০২০ চনতে পৰ্যটকৰ বাবে বনাঞ্চলখন মুকলি কৰা হৈছিল যদিও ক’ভিডৰ বাবে পৰ্যটকৰ উপস্থিতি আশানুৰূপ নাছিল বনাঞ্চলখনত ৷ ক’ভিডৰ পাছত দেওবাৰে পুনৰ পৰ্যটকৰ বাবে মুকলি কৰা হয় পানপুৰ বনাঞ্চল ৷

চতিয়াৰ বিধায়ক পদ্ম হাজৰিকা, বিশ্বনাথৰ বিধায়ক প্ৰমোদ বৰঠাকুৰ, বিশ্বনাথৰ উপায়ুক্ত দেৱ কুমাৰ মিশ্ৰ, ৰাজ্যৰ প্ৰধান বন সংৰক্ষককে আদি কৰি কেইবাগৰাকীও বিশিষ্ট অতিথিয়ে এই শুভাৰম্ভণী অনুষ্ঠানত অংশগ্ৰহণ কৰে ৷ অনুষ্ঠানত চতিয়াৰ বিধায়ক পদ্ম হাজৰিকাই পানপুৰ বনাঞ্চলৰ ওপৰত নিৰ্মাণ কৰা এখনি তথ্যচিত্ৰ ইউটিউবৰ জৰিয়তে মুকলি কৰে ৷

লগতে পঢ়ক : Kaziranga National Park : এটা মাহতে ১৮ হাজাৰৰো অধিক দেশ-বিদেশী পৰ্যটকে ভিৰ কৰিলে কাজিৰঙা