ৰঙাপৰা, 24 মাৰ্চ: বাৰিষালৈ আৰু বেছি নাই । ফলত নৈপৰীয়া মিছামাৰীৰ বঙালগাঁৱৰ ৰাইজ শংকিত হৈ পৰিছে ৷ শোণিতপুৰ জিলাৰ মিছামাৰীৰ বঙালগাঁৱৰ ৰাইজে আজিকোপতি গাভৰু নদীৰ গৰাখনীয়াৰ পৰা পৰিত্ৰাণ নোপোৱাত শংকিত আৰু ক্ষুব্ধ হৈ পৰিছে ৷ ইতিমধ্যে বঙালগাৱঁৰ কেইবাটাও পৰিয়ালৰ মাটি-ভেটি গাভৰু নদীত জাহ গৈছে ৷
বিগত প্ৰায় ১৫ বছৰ ধৰি অৰুণাচল প্ৰদেশৰ পৰা বৈ অহা গাভৰু নদীৰ গৰাখনীয়া অব্যাহত আছে যদিও নৈপৰীয়া ৰাইজক বান-গৰাখনীয়াৰ পৰা ৰক্ষা কৰিবৰ বাবে ৰাজ্য চৰকাৰ তথা জলসম্পদ বিভাগে কোনো পদক্ষেপ হাতত গ্ৰহণ কৰা নাই ৷ ফলত মিছামাৰীৰ বঙালগাঁৱৰ ৰাইজে গাঁঠিৰ ধন ভাঙি নৈ খনৰ গৰাখনীয়া প্ৰতিৰোধৰ প্ৰচেষ্টা হাতত লৈছে ৷ বিগত পাঁচটা বছৰে মাটি-ভেটি ৰক্ষা কৰাৰ শ্ল’গানেৰে শাসনলৈ অহা বিজেপি চৰকাৰখনে নৈখনৰ গৰাখনীয়া প্ৰতিৰোধৰ কোনো ব্যৱস্থাৰ নোলোৱাৰ অভিযোগ উত্থাপন হৈছে ৷
লগতে পঢ়কঃ দিব্যাংগসকলক লৈ দলৰ বিৰুদ্ধে সৰৱ প্ৰতিবন্ধী সুৰক্ষা সংস্থা
