আমগুৰি, ১৭ জানুৱাৰী : মাঘ বিহুৰ অন্যতম এক পৰম্পৰা হৈছে ম’হযুঁজ (Buffalo Fight in Assam) ৷ ৰাজ্যত অতীজৰে পৰা চলি আহিছে এই ক্ৰীড়া ৷ কিন্তু উচ্চতম ন্যায়ালয়ে ম’হযুঁজৰ ক্ষেত্ৰত নিষেধাজ্ঞা আৰোপ কৰে কেইবছৰমান পূৰ্বে (Supreme Court's ban on Buffalo fight)৷ তাৰ পাচতেই ম’হযুঁজক লৈ সৃষ্টি হয় বাক-বিতণ্ডাৰ ৷ উচ্চতম ন্যায়ালয়ৰ এই ৰায়ক কোনোপধ্যেই মানি ল’ব খোজা নাই গুৱালসকলে ৷ সেয়ে বিভিন্ন স্থানত অনানুষ্ঠানিকভাৱে হ’লেও ম’হযুঁজ অনুষ্ঠিত হৈ আহিছে ৷
শিৱসাগৰৰ কালুগাঁও জাপিসজীয়া পথাৰতো পৰম্পৰা ৰক্ষা কৰি যুঁজোৱা হ’ল ম’হ ৷ কিন্তু প্ৰতিকীভাৱেহে এই যুঁজ অনুষ্ঠিত কৰা হয় (Symbolic Buffalo Fight in Sivsagar)৷ নৱপ্ৰজন্মক মহযুঁজৰ বিষয়ে সাম্যক জ্ঞান দিবৰ কাৰণে আৰু ঐতিহ্য ৰক্ষাৰ বাবে অনুষ্ঠিত কৰা হ’ল এই প্ৰতিকী ম’হযুঁজ । ম’হৰ প্ৰতিকী নিৰ্মাণ কৰি মানুহে যুঁজ কৰা দেখা গ’ল ম’হৰ দৰে ৷ বিগত বৰ্ষতো এইদৰেই অনুষ্ঠিত হৈছিল ম’হযুঁজ ৷
এই প্ৰতিকী ম’হ যুঁজ চাবলৈ উদগ্ৰীৱ হৈ পৰে গাঁওবাসী । শ শ লোকে ম’হযুঁজ চাই আনন্দ লভিলে । ক'ভিড পৰিস্থিতিৰ মাজতো গাঁওবাসীয়ে প্ৰতিকী ম’হ যুঁজ কৰি ঐতিহ্য আৰু পৰম্পৰা ৰক্ষাৰ চেষ্টা চলালে শিৱসাগৰত ।
ন্যায়ালয়ৰ ৰায়ক সন্মান জনায় জাপিসজীয়া গাঁওবাসীয়ে আমোদ ল’লে প্ৰতিকী ম’হ যুঁজৰ । বহু বছৰ পূৰ্বে জাপিসজীয়া পথাৰত প্ৰকৃত ম’হ যুঁজ হৈছিল যদিও ন্যায়ালয়ৰ বাধাৰ পিছতে প্ৰতিকী মহযুঁজ আৰম্ভ কৰে গাঁওখনৰ লোকসকলে । সাইলাখ ম’হৰ দৰেই যুঁজ লগা দেখা গ’ল দুটা প্ৰতিকী ম’হক ৷
অৱশ্যে এইবাৰ ক’ভিডৰ বাবে স্থগিত ৰখা হ’ল ঐতিহাসিক আঁহতগুৰিৰ ম’হযুঁজ (Ahatguri buffalo Fight cancelled) ৷ মাঘ বিহুত ম’হযুঁজ চাবলৈ লোকে লোকাৰণ্য হৈ পৰা আঁহতগুৰি এইবাৰ নিজম পৰি ৰ’ল ৷ কিন্তু নগাঁও আৰু মৰিগাঁও জিলাৰ কেইবাটাও স্থানত ম’হযুঁজ অনুষ্ঠিত কৰা হয় ৷ পৰম্পৰা ৰক্ষা কৰি গুৱালসকলে ম’হ যুঁজালে মাঘ মাহত ৷ একমাত্ৰ গুৱালসকলৰ সন্মতিতহে আয়োজন কৰা হয় এই ম’হযুঁজ সমূহ ৷
লগতে পঢ়ক: Buffalo Fight in Nagaon : গোণা ম’হৰ যুঁজত কঁপিল গোমোঠা গাঁৱৰ পথাৰ
