কাছাৰত আকৌ আৰম্ভ কয়লা ছিণ্ডিকেট!

কাছাৰত শ শ অবৈধ কয়লাৰ ট্ৰাক ৷ বন্ধ হোৱা নাই ছিণ্ডিকেট ৷ যোৱা কেইদিনমান অসম-মেঘালয়ৰ সীমান্তৱৰ্তী দিগৰখালৰ কয়লা ছিণ্ডিকেট বন্ধ আছিল যদিও আকৌ আৰম্ভ হৈছে এই অবৈধ বেহা ৷ বৰাকৰ একাংশ যুৱ কংগ্ৰেছীয়ে উত্থাপন কৰিছে এই অভিযোগ ৷

শিলচৰ,15 অক্টোবৰ: কয়লা মাফিয়া,আৰক্ষীসহ বহু ৰাজনৈতিক নেতা-পালি নেতাই কাছাৰত আকৌ আৰম্ভ কৰিছে কয়লাৰ ছিণ্ডিকেট,এই অভিযোগ উত্থাপন কৰিছে কাছাৰৰ যুৱ কংগ্ৰেছীয়ে ৷ দুৰ্গোৎসৱৰ পঞ্চমীৰ দিনাৰ পৰা এতিয়ালৈকে কাছাৰৰ দিগৰখাল হৈ বাংলাদেশলৈ পাৰ হৈছে 200 খন কয়লা বোজাই ট্ৰাক ৷ কয়লা ছিণ্ডিকেটক লৈ ৰাজ্য তোলপাৰ লগাৰ পিচত যোৱা কেইদিনমান অসম-মেঘালয়ৰ সীমান্তৱৰ্তী দিগৰখালৰ কয়লা ছিণ্ডিকেট বন্ধ আছিল যদিও আকৌ আৰম্ভ হৈছে এই অবৈধ বেহা ৷ বৰাকৰ একাংশ যুৱ কংগ্ৰেছীয়ে উত্থাপন কৰিছে এই অভিযোগ ৷

জানিব পৰা মতে, এজন প্ৰভাৱশালী মন্ত্ৰীৰ লগত ৰাজধানী এক্সপ্ৰেছত সাক্ষাৎ হোৱাৰ পিচত সেউজ সংকেত পাই আকৌ আৰম্ভ কৰা হৈছে কাছাৰৰ এই কয়লা ছিণ্ডিকেট ৷ উল্লেখযোগ্য যে,এই কয়লা ছিণ্ডিকেটৰ টকা সংগ্ৰহ আৰু বিভিন্ন দিশ চোৱা-চিতাৰ দায়িত্বত আছে কালাইন আৰু মাছিমপুৰৰ দুজন যুৱক ৷

কাছাৰৰ যুৱ কংগ্ৰেছীয়ে এই অবৈধ কয়লা ছিণ্ডিকেট সন্দৰ্ভত প্ৰশাসনক ভূমিকা ল'বলৈ অনুৰোধ জনাইছে ৷