নগাঁও, 3 ছেপ্টেম্বৰ : এটি কণমানিৰ নাগাৰা বাদনে চমক সূষ্টি কৰিছে নগাঁৱত ৷ জিলাখনৰ ধিঙৰ এটি ছবছৰীয়া কণমানিৰ নাগাৰা বাদনে চমক সৃষ্টি কৰিছে । কণমানিটোৰ নাম কৃতি কল্প বৰা, বয়স মাত্ৰ 6 বছৰ । ঘৰ জিলাখনৰ ধিঙৰ ৰত্ননগৰত ।
এইগৰাকী কণমানিৰ নাগাৰা বাদনে এতিয়া আকৰ্ষিত কৰিছে সকলোকে । কণমানিটিয়ে একেসময়তে বজাব পাৰে একেলগে চাৰিটাকৈ নাগাৰা । উল্লেখ্য যে, লকডাউনৰ সময়ছোৱাত ঘৰতে আৱদ্ধ বহুজনে ঘৰুৱা কামবনৰ লগতে বিভিন্ন ক্ষেত্রত নিয়োজিত হৈ পৰিছিল । কিন্তু ধিঙৰ এদল কণমানি ব্যস্ত হৈ পৰিছিল ধিঙৰ ৰত্নজ্যোতি মইনা পাৰিজাতে উদ্যোগ লোৱা মহাপুৰুষ শ্ৰীমন্ত শংকৰ দেৱৰ অমৰ সৃষ্টি নাগাৰা বাদন আৰু দিহানামৰ চৰ্চাত । যাতে গুৰুজনাৰ অমৰ সৃষ্টি আৰু কৃষ্টি-ৰাজিক নৱপ্ৰজন্মই জীয়াই ৰাখিবলৈ সক্ষম হয় । সেয়ে ধিঙৰ এইসকল শিশু ব্যস্ত হৈ পৰিছিল সংস্কৃতি সাধনাত ।
যি সময়ত নৱপ্ৰজন্মৰ একাংশ উচ্ছৃঙ্খলতাৰ দিশে ধাৱমান হৈছে, একে সময়তে এইসকল কণমানিয়ে অসমীয়া সংস্কৃতি জীয়াই ৰখাৰ উদ্দেশ্যৰে সংস্কৃতি সাধনাত ব্ৰতী হোৱা কাৰ্যই সমাজলৈ কঢ়িয়াই আনিছে এক শুভ বাৰ্তা । মাতৃ স্মৰণীকা বৰা আৰু পিতৃ তীক্ষ্ণ দেননাথৰ একমাত্র পুত্র সন্তান হ'ল কৃতিকল্প । মাক দেউতাকৰ অফুৰন্ত হেঁপাহ পুত্ৰ দেৱবাদ্যত পাৰ্গত হোৱা । ভৱিষ্যতে এগৰাকী বলিষ্ঠ বাদ্য বাদক হোৱাৰ সপোন ৰখা কল্পলৈ ইটিভি ভাৰতৰ পৰা বহুত শুভকামনা ।
লগতে পঢ়ক : ইচ্ছা মৃত্যু বিচাৰি ৰাজ্যপাললৈ আবেদন এজন অসহায় ব্যক্তিৰ
