কলিয়াবৰ, 24 আগষ্ট : কলা আৰু সাহিত্যৰ প্ৰতি সমৰ্পিত এক অখিল ভাৰতীয় অনুষ্ঠান 'সংস্কাৰ ভাৰতী,অসম প্ৰান্ত'ৰ ৰূপালী জয়ন্তী উপলক্ষে কলিয়াবৰ সমষ্টিৰ বিদ্যালয়সমূহত সংগীত অনুষ্ঠানৰ আয়োজন কৰা হয় ৷ সংগীতসূৰ্য ড০ ভূপেন হাজৰিকাই ৰচনা কৰা আৰু জয়ন্ত হাজৰিকাৰ কণ্ঠৰ কালজয়ী গীত 'আজি জীৱন বুটলিবি হাঁহি হাঁহি আহ' শীৰ্ষক গীতেৰে 126 টা সমষ্টিৰ বিদ্যালয়সমূহত সংগীত প্ৰতিযোগিতাৰ আয়োজন কৰা হয় ৷ কলিয়াবৰ সমষ্টিৰ বিদ্যালয়সমূহৰ মাজত অনুষ্ঠিত হোৱা এই প্ৰতিযোগিতাত প্ৰথম স্থান অধিকাৰ কৰে শিশু বিদ্যাপীঠ উচ্চ মাধ্যমিক বিদ্যালয় কুঁৱৰীটোলে ৷ আনহাতে, দ্বিতীয় আৰু তৃতীয় স্থান স্থান লাভ কৰে ক্ৰমে কুঁৱৰীটোল উচ্চ মাধ্যমিক বিদ্যালয় আৰু কলিয়াবৰ উচ্চতৰ মাধ্যমিক বিদ্যালয়,হাটবৰে ৷ লগতে পূৱথৰীয়া উচ্চ মাধ্যমিক বিদ্যালয় আৰু কলিয়াবৰ উচ্চতৰ মাধ্যমিক বিদ্যালয়, শিলঘাটক বিচাৰকৰ বিশেষ বঁটা প্ৰদান কৰা হয় ৷
অহা 5 চেপ্তেম্বৰ তাৰিখে নগাঁও জিলাৰ আটাইকেইটা সমষ্টিৰ শীৰ্ষ স্থানপ্ৰাপ্ত বিদ্যালয়সমূহৰ মাজত জিলা ভিত্তিক প্ৰতিযোগিতা অনুষ্ঠিত কৰা হ'ব । 2020 চনৰ এপ্ৰিল মাহত গুৱাহাটীত অসমৰ 33 খন জিলাৰ এক লাখ ছাত্ৰ-ছাত্ৰীৰ জৰিয়তে 'আজি জীৱন বুটলিবি হাঁহি হাঁহি আহ' শীৰ্ষক গীতটি গোৱাৰ পৰিকল্পনাৰ কথা প্ৰকাশ কৰে অনুষ্ঠানটোৰ বিষয়-ববীয়াই। পুৰণি গীতবোৰ ধৰি ৰখাৰ এই কাৰ্যসূচীয়ে ছাত্ৰ- ছাত্ৰীসকলক উপকৃত কৰাৰ লগতে চৰ্চাৰ বাট মুকলি কৰিব বুলি আশাবাদী বিষয়-ববীয়াসকল। শুকুৰবাৰে হাটবৰ কেন্দ্ৰীয় নাট্য সমাজ ভৱনৰ অনুষ্ঠানত 'সংস্কাৰ ভাৰতী,অসম প্ৰান্ত'ৰ সভাপতি নৃপেন কলিতা,সম্পাদক প্ৰণৱ চক্ৰৱৰ্তী আৰু ৰূপালী জয়ন্তী বৰ্ষ উদযাপন সমিতিৰ পুলকেশ বৰুৱা উপস্থিত থাকে ৷
